पोखरा । पोखरा–१६, लामाचौरस्थित इन्द्रराज्यलक्ष्मी माविमा विद्यालय व्यवस्थापन समिति गठन भएको १ वर्ष पूरा भएको सन्दर्भमा समीक्षा गरिएको छ । विद्यालय व्यवस्थापन समितिले यस अवधिमा गरेका काम तथा बैठकका निर्णय कार्यान्वयन अवस्थाबारे समीक्षा गरेको हो ।

अध्यक्ष दिलबहादुर थापाले विद्यालयको चौतर्फी विकासका लागि सबै एकजुट भएर तनमनका साथ लाग्नुपर्नेमा जोड दिए ।

प्रअ केशवप्रसाद अम्गाईले समिति गठनपछि २४ नियमित तथा ५ विशेष गरी कुल २९ बैठक भएको जानकारी दिए । उनले बैठकका निर्णय कार्यान्वयन अवस्थाबारे ध्यानाकर्षण समेत गराए ।

कार्यक्रममा विद्यालय व्यवस्थापन समिति सदस्य तथा अनुगमन समिति संयोजक चित्रबहादुर थापाले विद्यालय व्यवस्थापन समिति मातहतका सम्पूर्ण समिति, विद्यालय प्रशासन, शिक्षक, कर्मचारी एक ढिक्का भएमा विद्यालयको शैक्षिक गुणस्तर अभिवृद्धि हुने औंल्याए ।

शिक्षक अभिभावक संघ अध्यक्ष राजकुमार क्षत्रीले विद्यालय अध्यक्ष थापालाई विद्यालयको सामाजिक परीक्षण प्रतिवेदन हस्तान्तरण गरे । कार्यक्रममा विद्यालय व्यवस्थापन समिति, शिक्षक अभिभावक संघ, सहायक प्रअद्वय पूर्णभद्र अधिकारी (शैक्षिक) र बलबहादुर श्रेष्ठ (प्रशासनिक), सूचना अधिकारी सीता पौडेल लगायतको उपस्थिति थियो ।