पोखरा । शिवशक्ति क्याम्पस, पोखराको तीनदिने शैक्षिक भ्रमण सम्पन्न भएको छ । कास्कीहुँदै स्याङ्जा, पाल्पा, गुल्मी, अर्घाखाँची, कपिलबस्तु, रुपन्देहीका विभिन्न धार्मिक, ऐतिहासिक एवं पर्यटकीय महत्वका स्थलहरुको भ्रमण गरिएको हो ।

१० शिक्षक र २६ विद्यार्थी सम्मिलित टोलीले स्याङ्जाको मिर्मी, सेतीवेणिको शिला, रिडीको तीनमुखे पुल अवलोकन गरी अर्घाखाँचीस्थित धार्मिक महत्वको सुपादेउराली मन्दिर दर्शन गरेको थियो । साथै गौतम बुद्ध जन्मस्थल लुम्बिनी भ्रमण गरी, बुटवलहुँदै पाल्पा सदरमुकाम तानसेनस्थित ऐतिहासिक पाल्पा दरबार, रानीमहल, स्याङ्जाको आलमदेवीलगायत स्थलको भ्रमण गरेको क्याम्पस प्रमुख चन्द्रकान्त रेग्मीले बताए । कालीगण्डकी र्‍याफ्टिङमा विद्यार्थी औधी रमाएको क्याम्पसका लेखा प्रमुख नवराज बास्तोलाले बताए । यसखालको ऐतिहासिक, सांस्कृतिक अवलोकन तथा शैक्षिक भ्रमणले विद्यार्थीलाई पाठ्यक्रमसँगै अन्य विषयबस्तुबारे जान्ने मौका मिल्ने क्याम्पस प्रमुख रेग्मीले बताए ।

पोखरा ११, फूलबारीस्थित शिवशक्ति क्याम्पसमा स्नातक तहमा बिबिएस र बिएड संकायमा पढाइ हुन्छ । २०५० सालमा शिक्षा महाविद्यालय नामबाट शिक्षाशास्त्र सञ्चालन हुँदै आएकोमा २०७० सालमा व्यवस्थापन संकाय थप हुँदै शिव शक्ति पब्लिक कलेजको रुपमा चिनिन थालेको हो ।