पोखरा । नवआदर्श सामुदायिक विकास समाज (नाकोड्स) को आयोजनामा शुक्रबार लामाचौर कप राष्ट्रिय महिला तथा पुरुष भलिबल सुरु भएको छ । पुरुषतर्फ ५ टिमको सहभागिता रहेको प्रतियोगितामा शुक्रबार पुरुषतर्फ ४ खेल भए । राउन्ड रोविन लिग आधारमा खेलाइएको खेलमा घरेलु टोली गण्डकी प्रदेश शीर्षस्थानमा उक्लिएको छ ।

गण्डकी प्रदेश २ खेलबाट ४ अंक जोड्दै शीर्षस्थानमा रहेको छ । गण्डकीले पहिलो खेलमा बागलुङको गलकोट स्पोर्टस् क्लबलाई ३–१ सेटमा हराएको थियो । पहिलो र दोस्रो सेट लगातार २५–२१ र २६–२४ ले जितेको गण्डकीले तेस्रो सेट २६–२४ ले गलकोटलाई सुम्पेको थियो । अन्तिम सेट २५–१९ सहित आफ्नो पक्षमा पारेपछि स्पष्ट ३ अंक जोड्न सफल भयो ।

लामाचौर कपमा महिलातर्फ ४ र पुरुषतर्फ ५ टिमले भाग लिएका छन्

अन्तिम खेलमा गण्डकीको टिम मणिमुकुन्द भलिबल क्लबसँग ३–२ सेटमा हार व्यहोरेर १ अंकमात्र जोड्न सफल भयो । अत्यन्तै प्रतिस्पर्धात्मक खेलमा पहिलो सेट गण्डकीले २५–२० ले जितेको थियो । दोस्रो र तेस्रो सेट २१–२५ र १७–२५ मा मणिमुकुन्दलाई सुम्पियो । चौंथो सेटमा गण्डकी २५–१७ सेटसहित पुनरागमन भयो । पाँचौं तथा अन्तिम सेटमा मणिमुकुन्दले १५–१२ सेटमा गण्डकीलाई हराउँदै जित आफ्नो पक्षमा पा¥यो ।

दोस्रो खेलमा नेपाल पुलिस क्लबले मणिमुकुन्दलाई ३–१ सेटमा हराएर ३ अंक जोड्दै तेस्रो स्थानमा छ । पहिलो सेट २५–१६ ले गुमाएको पुलिसले उत्कृष्ट पुनारागमन गर्दै २५–२१, २५–१९ र २५–२२ को सेटमा खेल जितेको हो ।
तेस्रो खेलमा सशस्त्र प्रहरी बलको एपिएफ क्लबले गलकोटलाई २५–२३, २५–२३ र २५–१८ सेटमा हराएको हो । सोझो सेटमा जित निकालेको एपिएफ ३ अंकका साथ दोस्रो स्थानमा छ । गण्डकीविरुद्धको खेलमा २ अंक जोडेको मणिमुकुन्द चौंथो स्थानमा छ । पहिलो दिनमा २ खेल नै हारेको गलकोट अंक तालिकाको पुछारमा छ ।

शुक्रबार नै हुने भनिएको एपिएफ र पुलिसबीच समय अभावका कारण हुन नसकेको आयोजकले जनायो । शनिबार एपिएफ र पुलिसबीचको खेलसहित पुरुषतर्फको ४ र महिलातर्फको ३ खेल हुनेछ ।
प्रतियोगितामा महिलातर्फ नेपाल पुलिस र सशस्त्र प्रहरीको एपिएफ क्लब, न्यू डायमण्ड क्लब तथा एभरेष्ट भलिबल क्लब बुटवलले भाग लिएका छन् ।

लामाचौर कप राष्ट्रिय भलिबल प्रतियोगितामा महिला र पुरुषतर्फ उपाधि विजेता, उपविजेता र तृतीय हुने टिमले क्रमशः समान १ लाख ५० हजार, १ लाख र ५० हजार रुपैयाँ साथमा ट्रफी, मेडल र प्रमाणपत्र प्राप्त गर्ने छन् । उत्कृष्ट विद्यागततर्फ समेत नगद पुरस्कार वितरण गरिने आयोजकले जनाएको छ ।