पोखरा । पोखरा कलेज अफ म्यानेजमेन्टले स्नातक तह उत्तीर्ण विद्यार्थीको सम्मानमा मंगलबार ग्रेजुएसन समारोह गरेको छ ।

बिबिए र बिसिआइएस कार्यक्रमका ७८ विद्यार्थीलाई दीक्षित गरिएको कलेजका बिबिए कार्यक्रम संयोजक सरोज कुँवरले बताए । कार्यक्रममा पोखरा विश्वविद्यालय व्यवस्थापन संकायका डिन डा. दयाराज ढकालले विश्वविद्यालय र कलेजले प्रदान गरेको शिक्षालाई विद्यार्थीहरुले समाजको हितमा प्रयोग गर्नुपर्नेमा जोड दिए । समाजमा सबैले सम्झनालायक काम गरेर जीवन बिताउनुपर्ने समेत डिन ढकालले बताए । दीक्षित विद्यार्थीलाई डिन ढकालले कार्यक्षेत्रमा कर्तव्यनिष्ठ भएर विश्वविद्यालय र कलेजको शिर उँचो बनाउने सपथ ग्रहण समेत गराए ।

कार्यक्रममा पोखरा विश्वविद्यालयका परीक्ष नियन्त्रक डा. तुलसीराम भण्डारी, प्राडा विनायकप्रसाद भद्रा, कलेजका प्राचार्य डा. चैतन्यराज अधिकारी र उपप्राचार्य लिना नेगी श्रेष्ठलगायतले विद्यार्थीलाई व्यावसायिक तथा पेसागत जीवनको सफलताको कामना व्यक्त गरे ।

कलेज व्यवस्थापन समितिका कावा कोमलप्रसाद तिमिल्सिनाको अध्यक्षतामा भएको कार्यक्रममा विद्यार्थी र तिनका अभिभावक तथा शिक्षकको सहभागिता थियो । पोखरा विश्वविद्यालयको सम्बन्धन प्राप्त गरी २०५८ मा स्थापित कलेजले हाल स्नातक तहमा बिबिए र बिसिआइएस (आइटी) कार्यक्रमको अध्यापन गराउँदै आएको बिसिआइएस कार्यक्रम संयोजक इ. हरिप्रसाद बरालले बताए ।