पोखरा । एनएमबी बैंकले कन्या क्याम्पसलाइ सेनेटरी प्याड भेन्डिङ मेसिन सहयोग गरेको छ । बैंकले संस्थागत सामाजिक उत्तरदायित्वस्वरुप २ थान मेसिन सहयोग गरिएको बैंकका गण्डकी प्रदेशका प्रमुख दुर्गाराम पुरीले जनाए ।
कन्या क्याम्पस पोखराका व्यवस्थापन समिति अध्यक्ष योगेन्द्र प्रधानको अध्यक्षतामा भएको कार्यक्रममा बैंकका प्रदेश प्रमुख पुरीले क्याम्पस र बैंकबीचको आत्मीय सम्बन्ध अझ प्रगाढ बन्दै जाने बताए ।

क्याम्पस प्रमुख सुरेशकुमार मानन्धरले गुणस्तर सुनिश्चितता प्रत्यायन प्रमाणपत्र प्राप्त क्याम्पसले छात्रालाई निशुल्क सेनिटरी प्याड उपलब्ध गराउँदै आएकोमा यस कार्यबाट क्याम्पसमा अध्ययनरत सम्पूर्ण छात्राहरुलाई प्याडको उपलब्धताका लागि सहज भएको बताए ।

कार्यक्रममा एनएमबी बैंकका वरिष्ठ क्षेत्रीय व्यवस्थापक दिभिरविक्रम शाह, महेन्द्रपुल शाखा प्रमुख सुदीप पौडेल, प्राध्यापक संघका सभापति डा. भूमिराज बस्ताकोटी, छात्रा कल्याण समितिका संयोजक ममता शाह लगायत प्राध्यापक, कर्मचारी र छात्राहरूको उपस्तिथि रहेको थियो । कार्यक्रम संचालन सहायक क्याम्पस प्रमुख चित्रबहादुर श्रेष्ठले सञ्चालन गरेका थिए । पोखराको नदीपुरस्थित कन्या क्याम्पसमा कक्षा ११ देखि स्नातकोत्तर सम्मको पढाइ हुने गर्दछ । क्याम्पसमा हाल ७ सय ६१ जना पढ्छन् ।