पोखरा । सावित्रा भण्डारीको दोहोरो ह्याट्रिकमा एपिएफ क्लबले महिला फुटबलमा सहज जीत हात पारेको छ ।

नवौं राष्ट्रिय खेलकुद प्रतियोगिताअन्तर्गत शुक्रबार वालिङस्थित मालेबगर फुटबल मैदानमा भएको पहिलो खेलमा एपिएफले प्रदेश १ लाई ७–१ गोलअन्तरले पराजित गर्दै जीत निकालेकोे हो ।

खेलको २३ औं मिनेटमा एपिएफकी भण्डारीले पहिलो गोल गरेकी थिइन् । त्यसलगत्तै प्रदेश १ की अन्जना थुलुङ राईले गोल गर्दै खेल बराबरीको स्थितिमा पुर्‍याइन् ।

एपिएफकी भण्डारीले ४० औं मिनेटमा व्यक्तिगत दोस्रो गोल गरिन् भने ४५ औ मिनेटमा तेस्रो गोल गरेर ह्याट्रिक पूरा गरिन् ।

दोस्रो हाफमा उनले ५१ औं र ५८ मिनेटमा चौंथो र पाँचौं गोल गरिन् । ६० औं मिनेटमा एपिएफकी अनिता केसीले छैटौैं गोल गरेर अग्रता टाढा पारिन् । त्यस्तै एपिएफकी भण्डारीले ६५ औं मिनेटमा गोल गरेर दोहोरो ह्याट्रिक पूरा गरिन् ।

दोस्रो खेलमा गण्डकी प्रदेश विजयी भएको छ । कर्णाली प्रदेशलाई ३–० गोल अन्तरले पराजित गर्दै गण्डकीले जीत दर्ता गरेकोे हो । खेलको ३३ औं मिनेटमा गण्डकीकी शान्ति नेपालीले पहिलो गोल गर्दैे टिमलाई अगाडि बढाएकी थिइन् ।

५८ औं र ६६ औं मिनेटमा उदया थापाले दोस्रो र तेस्रो गोल गरिन् ।

तेस्रो तथा अन्तिम खेल बराबरीमा टुंगियो । मधेश प्रदेश र सुदूरपश्चिम प्रदेशले निर्धारित समयसम्म कुनै गोल नगरेपछि अंक बाँडेका थिए ।