पोखरा । लायन्स क्लब अफ पोखरा गण्डकी दोभानले पोखरा २४, कास्कीकोट मौजामा खाद्य सामग्री वितरण गरेको छ । क्लबले त्यहाँका ९ घरपरिवारका अति विपन्न, अपांगता भएका व्यक्ति, अशक्त, वृद्धवृद्धा एवं सुस्त मनस्थिति भएका व्यक्तिलाई दाल, चामल, तेल, आँटा, नुन लगायत खाद्य सामग्री वितरण गरेको हो ।
बाल दिवसकै दिन भएको सो कार्यक्रममा स्थानीय ४० जना बालबालिकालाई स्टेसनरी सामान, मास्क, सेनिटाइजर समेत वितरण गरिएको क्लब अध्यक्ष सरु थापाले जानकारी दिइन् ।
प्रमुख अतिथि लायन्स क्लब इन्टरनेस्नल डिस्ट्रिक्ट ३२५ बि १ नेपालका रिजन–१० का रिजन चेयर पर्सन अमृत बरालले समाजमा लायन्स गरेका कार्यको बारेमा प्रकाश पारेका थिए । उनले लायन्स पोखरा गण्डकी दोभान पनि विभिन्न सामाजिक क्रियाकलापमा सक्रिय रहेको भन्दै अझ प्रगतिको कामना गरे ।
कार्यक्रममा क्लबका संस्थापक अध्यक्ष लता थापा कुँवर, जोन चेयर पर्सन सरला तिमिल्सिना, स्थानीय समाजसेवी टीकाराम त्रिपाठी, पोखरा २४ की जनप्रतिनिधि मीना नेपाली लगायतले शुभकामना मन्तव्य व्यक्त गरेका थिए ।
क्लब अध्यक्ष सरु थापाको अध्यक्षतामा भएको कार्यक्रममा स्वागत कार्यक्रम संयोजक विद्या गिरी र सञ्चालन सचिव चन्द्रु रानाभाटले गरेका थिए । महिलामात्र आबद्ध सो क्लबमा हाल ३५ सदस्य छन् ।