पोखरा  । पोखराका युवा व्यवसायी हरिराज पन्त नेपाली कांग्रेसको उद्योग तथा व्यापार विभागको आमन्त्रित सदस्यमा मनोनीत भएका छन् । पन्तलाई कांग्रेसको उद्योग तथा व्यापार विभागका प्रमुख चिनकाजी श्रेष्ठले गएको चैतमा नै सो पदमा मनोनयन गरेका थिए । कोभिडको कारण पन्तले मनोनयनपत्र भने हालसालै बुझेका हुन् ।
उनी पोखरा उद्योग वाणिज्य संघका कार्यसमिति सदस्य तथा नेपाल वितरक महासंघका महासचिवसमेत हुन् । लायन्स क्लबदेखि अन्य सामाजिक संघ/संस्थामा क्रियाशील उनले उद्योगी/व्यवसायीको हितमा कार्यरत रहँदाकै बेला प्राप्त जिम्मेवारीलाई कुशलतापूर्वक निर्वाह गर्ने प्रतिबद्धता जनाए ।
‘निजी क्षेत्रमैत्री वातावरण निर्माणमा राजनीतिक दलको भूमिका महत्वपूर्ण हुन्छ’,उनले भने, ‘खुला अर्थतन्त्रको पक्षमा रहेको कांग्रेसको भूमिका अझ व्यवसायमैत्री बनाउन नीतिगत रुपमा नै लबिङमा लाग्नेछु ।’