पोखरा । एसओएस बालग्राम रामबजार पोखराका आमाहरूले नयाँबजारमा बसोबास गर्दै आएका दृष्टिविहीन एवं अपांगता भएका परिवारलाई खाद्य सामग्री सहयोग गरेका छन् ।
बालग्रामका संस्थापक हर्मनमाइनरको जन्मदिन एवं ३५ औं एसओएस दिवस अवसरमा उनीहरुले ५ जना दृष्टिविहीन र ११ जना शारीरिक अपांगता भएका परिवारलाई २५ हजार मूल्य बराबरको राहत सामग्री सहयोग गरेका हुन् ।
एसओएस बालग्राममा कार्यरत २४ जना आमाले संकलन गरेको रकमबाट चामल, दाल, तेल, नून, चिउरा, बेसार, माक्स लगायत सामग्री खरिद गरी वितरण गरिएको लक्ष्मीदेवी बास्तोलाले बताइन् ।
निषेधाज्ञाको कारण रोजगारी गुमाएका र छाक बस्ने अवस्थामा पुगेका ती परिवारलाई तत्कालका लागि खाद्यान्न सहयोग गरिएको उनको भनाइ छ । बालग्रामका १५ घरमा १ सय ५३ जना बालबालिका छन् ।
दृष्टिविहीन पानुराम चौधरीले निषेधाज्ञाको कारण खाना समस्या छँदैछ, लामो समयसम्म घरभाडा तिर्न नसक्दा थप चिन्तित तुल्याएको बताइन् ।