पोखरा । पोखरा महानगरपालिकाले स्वास्थ्यकर्मी कर्मचारीहरुलाई हाजिर नगराएको र मन्त्रालयले समेत बेवास्ता गरेको भन्दै नेपाल स्वास्थ्यकर्मी संघ गण्डकी प्रदेशले ध्यानाकर्षण जनाएको छ ।

संघका अध्यक्ष नारायण बरालद्वारा जारी विज्ञप्तिमा गत चैत ३१ गतेको सचिवस्तरीय निर्णयको आधारमा महानगरभित्र काम गर्ने गरी अन्य पालिकाबाट रमाना लिई आएका स्वास्थ्यकर्मी कर्मचारीलाई महानगरले हाजिर नगरेको उल्लेख छ ।

महानगरसहित मन्त्रालयले पनि चासो नदिएकाले आफूहरुको ध्यानाकर्षण भएको संघले जनाएको छ ।

कोरोना महामारीको समयमा स्वास्थ्यका जनशक्ति विगत १ महिनादेखि कामविहीन र हाजिरविहीन बनाइँदा जनस्वास्थ्यमा असर पर्ने बरालले बताए । त्यसकारण रमानासहित उपस्थित भएका कर्मचारीहरुको हाजिर गर्न र आवश्यक निकासको पहल गरिदिन संघले माग पनि गरेको छ ।