पोखरा, १ कार्तिक । गोल्डेन बचत तथा ऋण सहकारी संस्था पोखरा–८ को ११ औं वार्षिक साधरणसभा शनिबार सम्पन्न भयो ।

सभाको पोखरा–८ का वडा अध्यक्ष रुद्रनाथ बरालले उद्घाटन गरेका थिए ।

त्यस अवसरमा प्रमुख अतिथि बरालले विपद्का अवस्थामा पनि संस्थाले आफ्नो कार्यक्रमको निरन्तरता दिएकोमा खुसी व्यक्त गरे ।

साथै उनले लघु वित्त तथा विकास बैंकमा आएको मर्जर अभियान सहकारीमा पनि चलाउनु पर्नेमा जोड दिँदै एक व्यक्ति एक सहकारी नीतिलाई कडाई साथ लागू गर्नुपर्ने बताए ।

संस्थाका अध्यक्ष बालकृष्ण बरालको अध्यक्षतामा भएको कार्यक्रममा सल्लाहकार दुर्गा कुमारी आचार्य र संस्थापक अध्यक्ष गुडाखर सापकोटाले शुभकामना मन्तव्य राखेका थिए ।

कार्यक्रममा उपाध्यक्ष गोपालबहादुर गुरुङले स्वागत तथा शिक्षा उपसमितिका संयोजक राजेशकुमार घिमिरेले सहकारीका सात सिद्धान्त बाचन गरेका थिए ।

सभामा अध्यक्ष बालकृष्ण बरालले वार्षिक प्रतिवेदन तथा कोषाध्यक्ष विना गुरुङबाट आर्थिक प्रतिवेदन प्रस्तुत भएको थियो ।

कार्यक्रमको सञ्चालन सचिव कृष्णप्रसाद पोखरेलले गरेका थिए ।

वि.सं. २०६६ मंसिर २२ देखि सञ्चालनमा आएको गोल्डेन बचत तथा ऋण सहकारी संस्थाका १४ सय ४३ सदस्य छन् । ७ करोड ५० लाख रुपैंया शेयर रकम रहेको यो संस्थाको बचत संकलन ३८ करोड ५० लाख रुपैँया पुगेको छ । आ.व. २०७६/७७ मा संस्थाले १ करोड ४ लाख बढी सञ्चालन मुनाफा आर्जन गर्न सफल भएको छ ।