लेखनाथ, १७ असोज । लेखनाथ उद्योग वाणिज्य संघले आफ्ना व्यवसायी सदस्य श्यामु थापा भटराईको ड्राईभिङ ईन्सिचियुडमा सहयोग गरेको छ ।

गत साउन २४ गते राति थापाले सञ्चालन गर्दै आएको पोखरा–२६ कालिकाचोकमा रहेको जुपिटर ड्राईभिङ ईस्टिच्युडमा अज्ञात समुहले आगजानी गरि कार, मोटरसाईकल र स्कुटमा क्षति पु¥याएको थियो । संघले राहत स्वरुप ३० हजार आर्थिक सहयोग गरेको हो ।

संघको २४ औं बार्षिक साधारण सभाको पूर्व तयारी अन्तरगत शुक्रबार बसेको महिला उद्यमी परिचालन उप–समितिको बैठकमा थापालाई सहयोग स्वरुपको संघका अध्यक्ष बलराम ढकाल, पूर्व अध्यक्ष बाबुराम गिरी र लक्ष्मी प्रसाद त्रिपाठीले सामुहिक रुपमा चेक प्रदान गरेका हुन् ।

संघले आफ्ना व्यवसायी सदस्यहरुमा पर्ने आपत विपत तथा दैवी प्रकोपलाई ध्यानमा राखि राहत कोष मार्फत सहयोग गर्दै आएको हो ।

महिला उद्यमी परिचालन उप–समितिकी सदस्य समेत रहेकी थापाले घटना घटेको दुई महिना पुग्दा पनि दोषी पत्ता नलागेको बताईन् । दोषीको पत्ता लगाई अविलम्ब कारवाहीलाई अगाडी बढाउन संघ मार्फत सुरक्षा निकायलाई दवाव दिन आग्रह गरेकी थिईन् ।