चितवनकी एक महिलालाई बलात्कारको आरोपमा नेपाल सशस्त्र प्रहरी बल हुल तथा दंगा व्यवस्था तालिम शिक्षालय लामापाटन, पोखरामा कार्यरत सशस्त्र प्रहरीका वरिष्ठ प्रहरी उपरीक्षक (एसएसपी) राजेन्द्र अधिकारीलाई कास्की प्रहरीले नियन्त्रणमा लिएको छ ।

आफू बालात्कृत भएको भन्दै जिल्ला प्रहरी कार्यालय कास्कीमा ती महिलाले उजुरी दिएपछि अनुसन्धानका लागि नियन्त्रणमा लिएको जिल्ला प्रहरी कार्यालय कास्कीका प्रमुख प्रहरी उपरीक्षक (एसपी) जीवनराम श्रेष्ठले बताए ।
‘चितवनकी एक महिलाले दिएको उजुरी आधारमा उहाँलाई नियन्त्रणमा लिएका छौं,’ एसपी श्रेष्ठले भने ।

पीडित महिलाले बुधबार दिउँसो सवा २ बजे प्रहरीको कन्ट्रोल नम्बर १०० मा फोन गरेर घटनाका बारेमा जानकारी दिएको र त्यसपछि प्रहरीले घटनास्थलमै पुगेर एसएसपी अधिकारीलाई पक्राउ गरेको उनले बताए।

उनले पीडित महिलाको स्वास्थ्य जाँच, प्रमाण संकलन तथा थप अनुसन्धान भइरहेको जानकारी दिए ।

स्याङ्जाका अधिकारी १ वर्षदेखि लामापाटनमा कार्यरत रहेको खुल्न आएको जिल्ला प्रहरी कार्यालय कास्कीका डीएसपी सुभाष हमालले बताए ।