पोखरा । गण्डकी प्रदेशको बजेट अधिवेशन आइतबार (आज) देखि डाँकिएको छ । काँग्रेसको लगातार अवरोधपछि चैत ५ देखि रोकिएको बैठक खुल्दै नखुली सरकारको सिफारिसमा बैशाख २३ मा आएर पाँचौ अधिवेशन अन्त्य गरिएको हो।
आइतबारदेखि सुरु हुने अधिवेशनमा सरकारका नीति तथा कार्यक्रम र बजेट सहित विभिन्न विधेयकहरुमाथि छलफल हुने छन् । असार १ मा बजेट सार्वजनिक गर्नुपर्ने भएकोले तयारीस्वरुप अधिवेशन सुरु हुन लागेको हो।
संसद् र सचिवालयमा ९ वटा विधेयक छ । ४ वटा नयाँ दर्ता गरिएको छ भने ३ वटा विधायन समितिमा छलफलकै क्रममा छ । २ वटा विधेयक विधायन समितिबाट पास भएर संसद्मा ‘टेवुल’ भैसकेको छ । छैठौं अधिवेशनमा बजेट र नीति तथा कार्यक्रमसँगै केही विधेयक पनि पास हुनेछन् ।
प्रदेशसभा सचिवालयसम्बन्धी विधेयक र वातावरण संरक्षणसम्बन्धी विधेयक सदनमा छ भने गण्डकी प्रदेश विज्ञान तथा प्रविधि प्रतिष्ठान स्थापना र सञ्चालन विधेयक, गण्डकी प्राविधिक शिक्षा तथा व्यवसायिक तालिम प्रतिष्ठान स्थापना र सञ्चालन विधेयक र गण्डकी प्रज्ञा प्रतिष्ठान स्थापना र सञ्चालन गर्न बनेको विधेयक सदनमा सामान्य छलफलपछि विधायन समितिमा पठाइएकोमा उतै थन्किएको छ । प्रदेश विकास समिति, गाउँसभा, नगरसभा र जिल्ला समन्वय समितिका सदस्यको सुविधासम्बन्धी विधेयक र प्रदेश लोकसेवा आयोगका पदाधिकारीको पारिश्रमिक, सेवाको शर्त र सुविधासम्बन्धी विधेयक नयाँ दर्ता भएको छ ।
नदीपुरबाट सभागृह बसाइसराइँ
गण्डकी प्रदेशको संसद् पनि कोरोना कहरमा परेको छ । साँघुरो कोठाभित्र चल्दै आएको संसद् बैठक कोरोनाबाट जोगिन सामाजिक दूरी कायम गर्नुपर्ने विज्ञहरुको सुझावसँगै नदीपुरबाट सभागृह सरेको छ । नदीपुरस्थित नगर प्रशिक्षण केन्द्रको बैठक कक्षमा यसअघि संसद् चलाइएको थियो ।
अहिले कोरोनाका कारण सोही भवनमा बैठक बस्ने अवस्था छैन । त्यसैले पोखरा महानगरपालिकाको स्वामित्वमा रहेको पोखरा सभागृहमा संसद् चलाउने निर्णय गरिएको छ । त्यसैका लागि रंगरोगन र सिंगारपटार पनि प्रदेश सरकारले नै गरिरहेको छ ।
सभागृहको प्रत्येक २ वटा कुर्ची र एउटा लाइन नै छोडेर सांसदको बसाइँ तोकिएको छ । अगाडि बेवल भने हुने छैन । कसैैलाई बोल्नुपरे उठेर अगाडि पुग्नुपर्छ । माथिल्लो तलामा दर्शक र पत्रकारलाई बस्ने ठाउँ तोकिएको छ । भुइँ तलामा सांसदहरु र कर्मचारी बस्नेछन् ।
सभामुखको कार्यकक्ष, कार्यव्यवस्था परामर्श समितिको कार्यकक्ष लगायत सदनलाई अत्यावश्यक कक्षहरु तयार गरिएको छ । छैटौं अधिवेशनका सबै बैठक यही हलमा चलाइने सरकारका प्रवक्ता रामशरण बस्नेतले बताए ।
नेकपाको बैठकमा मन्त्रीको आलोचना
नेकपाको संसदीय दलको बैठकमा प्रदेशका मन्त्रीहरुको कार्यक्षमता माथि प्रश्न उठेको छ । ‘मुख्यमन्त्रीज्यूले मात्रै प्रदेश सरकार धानिरहेको देखिन्छ । मन्त्रीहरुको भूमिका निकै कमजोर भयो,’ एक सांसदले भने, ‘मन्त्री ज्यूहरुको कामलाई लिएर दलको बैठकमै आलोचना भएको छ ।’
अर्का सांसदले पनि मन्त्रीहरुको कार्यशैलीलाई लिएर संसदीय दल सन्तुष्ट नभएको बताए । ‘चैतपछि पो लकडाउन भयो । त्योभन्दा पहिले केले रोक्यो काम गर्न ?,’ उनले भने, ‘मन्त्री भनेको छ, गाडी चढेको छ । काम केही छैन । यही हिसाबले प्रदेश सरकारप्र्रति जनताको गुनासो झन् बढ्दै जानेछ ।’ खासगरी बजेट खर्च र योजना कार्यान्वयनबारे बैठकमा छलफल भएको थियो ।
सांसदहरुले आगामी बजेटबारे सुझाव पनि दिएका छन् । पछिल्लो घटनाक्रम मध्यनजर गर्दै अधिकतम रोजगारी सिर्जना हुने कार्यक्रम लागू गर्न तथा स्वास्थ्य र कृषिलाई बजेटमा प्राथमिकता दिन सुझाव दिइएको हो । सरकारले संसदीय समितिहरुसँग पनि सुझाव लिएको छ ।
काँग्रेसको बैठकमा मुख्यमन्त्रीविरुद्ध निर्णय
मुख्यमन्त्री पृथ्वीसुब्बा गुरुङले काँग्रेसका सांसदहरुलाई अभद्र व्यवहार गरेको भन्दै देख प्रकट गरेको छ । चैत ५ मा काँग्रेस सांसदहरु सरकारले गरेका कामको असन्तुष्टि लिएर मुख्यमन्त्री गुरुङलाई भेट्न पुगेका थिए । तर कार्यकक्षमा छिर्नेबित्तिकै काँग्रेसका सांसदहरुलाई अभद्ररुपमा प्रस्तुति दिएको काँग्रेसको आरोप छ । त्यही घटनालाई लिएर काँग्रेसले २ महिनापछि खेद प्रकट गर्ने निर्णय गरेको हो ।
दवाडी दलको प्रवक्ता
नेपाली काँग्रेसले गण्डकी प्रदेश संसदीय दलको प्रवक्तामा प्रकाशचन्द्र दवाडीलाई तोकेको छ । शनिबार बसेको दलको बैठकले उनलाई प्रवक्ता जिम्मेवारी दिएको हो । दलको भूमिका सदनमा प्रभावकारी हुन नसकेको गुनासो बढिरहेका बेला संसद् गठन भएको साढे २ वर्षपछि जिम्मेवारी तोकिएको हो । दवाडी गोरखा क्षेत्र २ (ख) बाट निर्वाचित भएका हुन् ।
विधेयक पेश हुन नदिने
काँग्रेसले छैटौं अधिवेशनको पहिलो दिन हुने संसद् बैठकमा कुनै पनि विधेयक पेश हुन नदिने तयारी गरेको छ । ४ वटा दलका नेताले बोलेपछि सरकारको धारणा अनुसार सदनबारे निर्णय लिने काँग्रेसले जनाएको छ । शनिबार बसेको बैठकले नै ११ गतेको संसद् लगत्तै बैठक बसेर थप कदम अघि बढाउने निर्णय गरेको छ ।
‘प्रदेशमा सरकार भएको महसुस नागरिकले गर्न पाएनन् । कोरोनाले जनतालाई थिचिरहेको छ तर सरकार सुरमा मस्त छ,’ नवनियुक्त प्रवक्ता दवाडीले भने, ‘सरकारले गरेका सबै कामको प्रमाण सहित सदनलाई जवाफ दिनुपर्छ । अन्यथा सदन अघि बढ्न सक्दैन ।’ यसअघिको १४ बुँदे मागपत्र अझै सुनुवाइ नभएको र कोरोना थप एजेण्डा बनेको उनले बताए ।
‘काँग्रेसले १४ बुँदा अघि सारेर सदन अवरुद्ध गरेको विषय टुंगिएकै छैन । सदन अवरुद्ध हुँदाहुँदै अधिवेशन नै अन्त्य गरियो,’ उनी भन्छन्, ‘अब १५ औं बुँदा पनि थपिएको छ । कोरोना १ नम्बर बुँदा हो । सरकारले जिम्मेवार भएर नागरिकको रक्षामा लाग्नुपर्छ । नभए काँग्रेस टुलुटुलु हेरेर बस्न सक्दैन ।’
Related News
सम्बन्धित समाचार
काम चलाउ सरकारद्वारा दोस्रो आवधिक योजनाको आधारपत्र परिमार्जन, पाण्डे सरकारले तय गरेको सोच समेत फेरियो
एचआइभी संक्रमणले पढाइबाट वञ्चित
उषा र प्रकाश पोखरा साइकल दौड च्याम्पियन
पोखरा सिँगार्न दिनहुँ श्रमदानमा खटिन्छन् सीताराम
मुग्लिन–पोखरा सडक पूर्वी खण्डको म्याद थपियो
hero news full width
मुख्य समाचार
फेवाको मापदण्ड घटाउन सर्वोच्चमा रिट
सहकारीका विकृति राजनीतिकर्मीका लागि चुनौती : मुख्यमन्त्री अधिकारी
जेठ ४, २०८१पर्वत र बागलुङका सिडिओ फेरिए
जेठ ४, २०८१जनप्रिय क्याम्पस प्रमुखमा रमेशबहादुर खड्का
जेठ ४, २०८१धानको लोपोन्मुख प्रजाति संरक्षण गरिँदै
जेठ ४, २०८१गण्डकीमा थुप्रिए रुग्ण र समस्याग्रस्त योजना
जेठ ४, २०८१