१. कास्की जिल्लाको हेमजा गाउँमा आलु महोत्सव सुरु भएको छ। हेमजामा आयोजित आलु महोत्सवको क्रममा यो पाँचौं हो। पाँच वर्षदेखि निरन्तर महोत्सवको आयोजना गरेर हेमजाले आफूलाई आलु र कृषि गाउँको रूपमा चिनारी गराउन सफल भएको छ। आलु महोत्सव हेमजाको विशेषता भएको छ र अहिले अरुले पनि त्यसको सिको गर्न थालेका छन्।

२. ‘सुन्दर गाउँ हेमजा जाउँ’ आलुका स्वादिष्ट परिकार खाऔँ, आलु एकः परिकार अनेक’ भन्ने मूल नाराका साथ महोत्सव सुरु भएको छ। महोत्सव अहिले वरपर सबैका लागि एक आकर्षक र उदाहरण भएको छ।

३. महोत्सवको मूल नारालाई परिलक्षित गर्न महोत्सवमा आलुका परिकारका १५ वटा स्टल राखिएका छन्। त्यस्तै आलु बिक्री वितरण गर्ने ५० वटा व्यवसायिक स्टल २५ वटा, कृषि प्रवृधि प्रदर्शनी, एउटा प्राथमिक उपचार केन्द्र र एउटा सूचना केन्द्र राखिएका छन्।

४. उद्योग मन्त्री कर्णयहादुर थापाले उद्घाटन गरेको प्रदर्शनीमा आलुका अतिरिक्त ताजा तरकारीहरूको वृहत् प्रदर्शनी पनि गरिएको छ। प्रदर्शनीमा राखिएको आलुको ठूलो पहाड, बाल उद्यान, साँस्कृतिक कार्यक्रम स्थानीय र राष्ट्रिय स्तरका कलाकारको गायन र हाँस्य कलाकारको बेजोड प्रस्तुतिले महोत्सवलाई अरु आकर्षक पारेको छ।

५. आलु हेमजाको विशेष पहिचान भएको छ। तर त्यो गाउँमा आलु मात्र उत्पादन हुने होइन, अन्य साग सब्जी र तरकारीमा पनि त्यसले धेरै प्रगति गरेको छ। च्याउ खेतीमा पनि त्यसले निकै उन्नति गरेको छ। पोखरा र वरपरको बजारमा हेमजाको उत्पादन भनेपछि त्यसले ग्राहकलाई त्यसै आकर्षक गर्ने गरेको छ।

६. निर्वाहमुखी कृषि उत्पादनलाई हेमजाले व्यवसायीमुखी बनायो। व्यवसायीमुखी उत्पादन हुनासाथ कृषकको गोजीमा बढी पैसा पर्‍यो। उनीहरूमा उत्साह बढ्यो। गरे हुन्छ भन्ने भावना बढ्यो। त्यसमा पनि यो प्रदर्शनी आदिको व्यवस्थाले सिङ्गो हेमजाको नाम उच्च भएको छ। चारैतिर फैलिएको छ।

७. हेमजालाई कृषि पर्यटनको रूपमा चिनाउने त्यहाँका अग्रजहरूको लक्ष्य रहेको छ।यस्तो महोत्सवको व्यवस्थाले त्यो लक्ष्य पूर्ति गर्न सघाउ पुर्‍याउने छ। यसरी व्यवस्थित र व्यवसायिकतातिर लम्केको गाउँको लागि कोल्ड स्टोर्स सबभन्दा आवश्यक कुरा हो। त्यसको छिटो व्यवस्था हुनुपर्दछ। गाउँका अगुवाहरू र सम्बन्धित निकायले छिटो यसमा ध्यान केन्द्रित गर्नुपर्दछ।