१. भारतले धेरैपटक मिचाहापनको प्रदर्शन गरेको छ। नेपालले समयमै त्यसको जवाफ नदिएपछि त्यसले आफ्नो मिचाहापनको बराबर पुनरावृत्ति गर्ने गरेको छ। अहिले हालै भारतीय प्रहरीहरू बर्दीका साथ हतियार लिएर नेपालमा पसी बर्दीया जिल्लाको गुलरीया-८ को एक घरमा खानतलासी लिएको समाचार आएको छ।

२. भारतीय प्रहरीहरू नेपाल प्रहरीलाई पत्तै नदिई बर्दी र हतियारसहित आएर गुलरिया-८ मञ्जुरप्रसाद श्रेष्ठको घरमा अपराधी लुकेको छ भन्दै खानतलासी गरेका थिए। घर परिवारहरू सुतिरहेको बेलामा बिहान सबेरै आएर एक्कासी ढोका खोल्न लगाएका थिए। तिनीहरू एक घण्टासम्म तलासी लिएको बुझिएको छ।

३.     पछि नेपाल प्रहरीले थाहा पाएपछि तिनीहरूलाई स्कर्टिङ गरी भारत पठाएको थियो। तिनीहरूको त्यस्तो मिचाहापनको गुलरियावासीले निन्दा गरेका छन्। तर हाम्रा सरकारी अधिकारीहरू त्यसबारे केही नभनी  चुपचाप बसेका छन्। त्यसरी चुपचाप बसेकै कारण तिनीहरूको मिचाहापन बढ्दै आएको हो।

४. केही दिन पहिले मात्र पनि भारतीय अपराधीहरूका सम्बन्धमा त्यस्तै भएको थियो। भारतीय सञ्चारमाध्यमहरूले त्यहाँका दुर्इ जना अपराधीलाई नेपालको सिमानामा पक्रेको कुरा सार्वजनिक गरे। तर नेपाली अधिकारीहरू त्यो घटनाका बारे आफूलाई थाहा नभएझैं गरी मौन बसे।

५. बर्दीवालाहरू हतियारसहित त्यसरी आउनु खुल्ला हस्तक्षेप हो। त्यस्तो हस्तक्षेप कुनै पनि सार्वभौमसत्ता सम्पन्न राष्ट्रमाथि गर्न पाउँदैन। नेपाली प्रहरीहरू त्यसरी भारत पसे भने त्यो भारतीय प्रहरीलाई कदापि सह्य हुनेछैन। उनीहरूलाई सह्य नहुने कुरा उनीहरूले नेपालमाथि किन गर्दैछन्, त्यो बुझ्न नसकिने भएको छ।

६.     तिनीहरूले एक त नेपाल सानो राष्ट्र भएकोले हेपेको हुन सक्छ भने अको नेपालको राजनीतिक अस्थिरता र सङ्क्रमण अवस्थाबाट फाइदा उठाउन खोजेको हुनुपर्दछ। त्यसको अतिरिक्त नेपालका नेताहरू र कार्यकर्ताहरू स्वार्थी र निरीह भएकाले पनि तिनीहरूको हेपाहा प्रवृत्ति बढेको हुनुपर्दछ।

७. एक सार्वभौमसत्ता सम्पन्न र स्वतन्त्र राष्ट्रभित्र त्यसरी बर्दी र हतियारसहित प्रवेश गर्नु कदापि उचित होइन। यस्तामा हाम्रा अधिकारीहरूले जे छ त्यो पारदर्शी किसिमले जनसमक्ष राख्नुपर्दछ। लुकाउनु छिपाउनु आफै कमजोर बन्नु हो। यस्तो काम कसैले गर्नुहुँदैन। इतिहासले सराप्ने छ। यस्तोमा नेताहरू विशेष सजग र सर्तर्क हुनुपर्दछ। जनताले को कस्तो छ, त्यसको मूल्याड्ढन गरिरहेका छन्। अन्तमा हामी त्यसरी अनाधिकार नेपाल सीमाभित्र प्रवेश नगर्न भारतलाई फेरि जोडदार शब्दमा भन्न चाहन्छौं।