पोखरा, १७ कात्तिक। पोखरा महानगरपालिका-४ स्थित सर्वेश्वर व्यवसायी समितिको आयोजनामा सर्वेश्वर दीपावली साँझ हुने भएको छ।

तिहार पर्व अवसरमा कात्तिक २० गते दिपावली साँझ आयोजना गर्न लागिएको पोखरामा शनिबार आयोजित पत्रकार सम्मेलनमा समितिले जानकारी गराएको छ।

नेपाली मौलिक संस्कृतिको संरक्षण गर्दै व्यावसायिक हकहितको लागि यस वर्ष पनि उक्त साँझ आयोजना गर्न लागिएको कार्यक्रम संयोजक एकनारायण पनेरुले बताए।

उनका अनुसार एकदिने सो कार्यक्रममा लक्ष्य ब्याण्ड, तरेली सांगीतिक समूहसहितका रञ्जन गायक, मुस्कान रानाभाट, मिलन लामालगायत कलाकारहरुको प्रस्तुति रहने संयोजक पनेरुले जनाए।

पर्यटन प्रबर्द्धनमा विकास गर्ने उद्देश्यले बजार व्यवस्थापन र ब्यापार प्रबर्द्धनको लागिसमेत उक्त साँझको आयोजना गरिएको समितिका अध्यक्ष सन्तोष पौडेलले बताए। कार्यक्रममा नेपाली मौलिक कला, संस्कृति झल्कने गीत तथा संगीतलाई प्राथमिकता दिइनेछ। सर्वेश्वर मार्ग टोल सुधार समितिका देवकृष्ण पराजुलीले देशमा आर्थिक तरलता भएको अबस्थामा यस्ता कार्यक्रमले केही सहजता ल्याउने विश्वास व्यक्त गरे। समितिमा २ सय व्यवसायीहरु आवद्ध छन्।