पोखरा । गण्डकी प्रदेश प्रशिक्षण प्रतिष्ठान, पोखरा र नेपाल प्रशासनिक प्रशिक्षण प्रतिष्ठान जावलाखेल, ललितपुरको संयुक्त आयोजनामा प्रशिक्षक प्रशिक्षण भएको छ । गण्डकी प्रदेशअन्तर्गतका तालिम केन्द्र, प्रशिक्षण केन्द्र, तालिम प्रतिष्ठानमा कार्यरत तालिम प्रशिक्षकको पेसागत क्षमता विकास गराउने उद्देश्यले प्रशिक्षक प्रशिक्षण कार्यक्रम सञ्चालन गरिएको हो । माघ १६ गते देखि २० गतेसम्म सञ्चालित कार्यक्रममा वन अनुसन्धान तथा प्रशिक्षण केन्द्र, पोखरा; कृषि व्यवसाय प्रवद्र्धन सहयोग तथा तालिम केन्द्र, पोखरा; पशु सेवा तालिम केन्द्र, पोखरा; गण्डकी प्राविधिक शिक्षा तथा व्यावसायिक तालिम प्रतिष्ठान, गण्डकी प्रदेश विज्ञान तथा प्रविधि प्रतिष्ठान, गण्डकी प्रदेश; शिक्षा तालिम केन्द्र, तनहुँ; स्वास्थ्य तालिम केन्द्र, पोखरा; व्यावसायिक तथा सिप विकास तालिम केन्द्र पोखरा र पर्वत; प्राविधिक शिक्षा तथा व्यावसायिक तालिम परिषद्, गण्डकी प्रदेश कार्यालय, पोखरा टेक्निकल स्कुल; गण्डकी प्रदेश प्रशिक्षण प्रतिष्ठान; गण्डकी प्रदेश प्रहरी तालिम केन्द्र, पोखरा र सशस्त्र प्रहरी बल हुल तथा दंगा व्यवस्थापन तालिम शिक्षालय, पोखराबाट २६ जना प्रशिक्षक सभागी थिए ।

गडण्की प्रदेश प्रशिक्षण प्रतिष्ठानका कार्यकारी निर्देशक ऋषिराम पाण्डेको अध्यक्षतामा भएको प्रशिक्षक प्रशिक्षण कार्यक्रम प्रदेश सरकारका प्रमुख सचिव रविलाल पन्थले उद्घाटन गरेका थिए । उनले प्रशिक्षणबाट गण्डकी प्रदेश अन्तर्गतका विभिन्न तालिम केन्द्र तथा प्रतिष्ठानहरुमा कार्यरत प्रशिक्षक कर्मचारीले प्रशिक्षणका आधारभूत सिद्धान्त, मूल्य मान्यता तथा प्रशिक्षणमा प्रयोग हुने विविध प्रकारका विधिहरुको जानकारी प्राप्त गरी तालिमको गुणस्तर र प्रभावकारिता अभिवृद्धि गर्न सक्षम हुने विश्वास व्यक्त गरे ।

कार्यक्रममा नेपाल प्रशासनिक प्रशिक्षण प्रतिष्ठान जावलाखेलका सिनियर निर्देशक वसन्त सिग्देल, निर्देशक उत्तम आचार्य, उपनिर्देशक नवीन चापाचाईं तथा अनुसन्धान तथा प्रशिक्षण अधिकृत अनुप भूर्तेलले सहजीकरण गरेका थिए ।

समापन सत्रको अध्यक्षता गरेका गण्डकी प्रदेश प्रशिक्षण प्रतिष्ठानका कार्यकारी निर्देशक ऋषिराम पाण्डेले गण्डकी प्रदेश प्रशिक्षण प्रतिष्ठानले स्थापना कालदेखि नै गण्डकी प्रदेश अन्तरगतका कर्मचारी र जनप्रतिनिधिहरुको क्षमता अभिवृद्धि सम्बन्धी विभिन्न कार्य गरिरहेको उल्लेख गरे ।

गण्डकी प्रदेश प्रशिक्षण प्रतिष्ठानले आफ्ना सेवाहरुमा गुण व्यवस्थापन प्रणाली कार्यान्वयनमा ल्याएको छ । प्रतिष्ठानको गुण व्यवस्थापन प्रणालीका लागि क्वालिटी अष्ट्रियाबाट आइएसओ ९००१ः२०१५ गुणस्तर प्रमाण समेत प्राप्त भएको छ । गण्डकी प्रदेश प्रशिक्षण प्रतिष्ठानले हालसम्म जनप्रतिनिधि र कर्मचारी गरी १४ हजारभन्दा बढीलाई लामो तथा छोटो अवधिका तालिम तथा अभिमुखीकरण प्रदान गरेको छ ।