पोखरा । बुद्व विशाल बजार व्यापारिक एसोसिएसन, पोखराले पोखरा उद्योग वाणिज्य संघका नवनिर्वाचित अध्यक्ष लगायत कार्यसमितिहरुलाई बधाई तथा स्वागत गरेको छ ।

बिहीबार एक कार्यक्रम गर्दै नवनिर्वाचित कार्यसमितिलाई बधाई ज्ञापन गरिएको हो । कार्यक्रममा एसोसिएसनका मानार्थ सदस्य तथा सल्लाहकार केशवबहादुर खत्रीले संघले गर्ने हरेक राम्रा कामको साथमा एसोसिएसन साथमा रहेको बताए । खत्रीले व्यवसायमा पार्किङको समस्या रहेको हुनाले उद्योग वाणिज्य संघले सहजीकरण गर्नुपर्नेमा जोड दिए ।

संघका निवर्तमान अध्यक्ष पवन प्रजापतिले व्यवसायीका घरबहाल कर लगायत विभिन्न करका समस्याहरू रहेको बताउँदै यसबारे पोखरा महानगरपालिकासँग मिलेर काम गर्न संघलाई आग्रह गरे । प्रजापतिले एसोसिएसनले आफूलाई जुन सम्मान गरेको छ, त्यसका लागि धन्यवाद दिँदै व्यवसायीहरूलाई फुटेर हैन जुटेर काम गर्न आग्रह गरे ।

कार्यक्रममा संघका नव निर्वाचित अध्यक्ष गोकर्ण कार्कीले आफ्नो जित सम्पूर्ण व्यवसायीको जित भएको बताए । उनले आफू सधैँ व्यवसायीको साथमा रहेको बताउँदै व्यवसायीलाई परेको समस्या समाधान गर्न चौबिसै घण्टा तयार रहने प्रतिबद्धता जनाए । उनले व्यवसायीको हकहितका लागि नेपाल सरकार लगायत पोखरा महानगरपालिका साथै विभिन्न संघसंस्थासँग सहकार्य गर्दै काम गर्ने बताए ।

कार्यक्रममा पोखरा उद्योग वाणिज्य संघका निवर्तमान अध्यक्ष पवन प्रजापतिलाई आफ्नो कार्यकाल सफलतापूर्वक सम्पन्न गरेकोमा बुद्व विशाल बजार व्यापारिक एसोसिएसनले सम्मान गरेको थियो ।

एसोसिएसन अध्यक्ष इन्द्रराज अर्यालको सभापतित्वमा भएको कार्यक्रममा उपाध्यक्ष बुद्धिबहादुर कुँवरले स्वागत र सचिव थमनसिंह गुरूङले संचालन गरेका थिए ।