पोखरा । पोखरा स्वास्थ्य विज्ञान प्रतिष्ठानअन्तर्गत पश्चिमाञ्चल क्षेत्रीय अस्पतालको आकस्मिक कक्ष (इमर्जेन्सी) मा काम गर्ने प्यारामेडिक नारायण बराललाई कोरोनाको दोस्रो र तेस्रो भेरियन्टको बेला निकै डर थियो । अस्पतालमा कोरोना संक्रमितको चाप बढ्दा इमर्जेन्सीमै संक्रमित भरिभराउ हुन्थे । साधारण पिपिई भरमा उपचार गरेर घर फर्किन उनलाई अझ संकोच हुन्थ्यो । दिनभर संक्रमितसँगै हेलमेल हुँदा आफू संक्रमित हुने डर त छँदै थियो, परिवारका सदस्य संक्रमित होलान् भन्ने अर्को पिरलो थियो, उनलाई । बराल संक्रमणबाट जोगिए पनि इमर्जेन्सीका सहकर्मीहरु भने संक्रमित बने । डरै डरमा काम गरेका उनी गएको ३ हप्तादेखि भने ढुक्क छन् ।
अचेल इमर्जेन्सीमा कोरोनाका बिरामीहरु भर्ना भएका छैनन् । तर सामान्य रुघाखोकीका बिरामी भने पुगिरहन्छन् । कुनै बेला कोरोनाको बिरामीले भरिएको अस्पताल आजभोलि संक्रमितको संख्या २२/२३ को हाराहारीमा छ । पछिल्ला दिनमा संक्रमित घट्दै गएको अस्पतालका कोभिड फोकलपर्सन डा. शरदचन्द्र बरालले जानकारी दिए । ‘अहिले बिस्तारै संक्रमितको संख्या घटेको छ,’ उनले भने, ‘हामीले २ स्थानमा आइसोलेसन चलाइरहेको थियौं, बिरामीको संख्या कम भएकाले गएको शनिबारदेखि एक ठाउँबाट चलाइरहेका छौं ।’
संक्रमितको चाप बढेको समयमा मेडिकल वार्डमा समेत अस्पतालले आइसोलेसन चलाएको थियो । बिरामीको संख्या कम हुँदै गएपछि गत शनिबारबाट सामान्य रोगका बिरामी भर्ना गरेको छ । आजभोलि जटिल समस्याका संक्रमित कम आएका कारण अक्सिजन खपत पनि घटेको डा. बरालले जनाकारी दिए । ‘अहिले दैनिक ७०/८० सिलिन्डरमात्र अक्सिजन खपत हुन्छ,’ उनले भने, ‘पहिला त एक दिनमै साढे ३ सयसम्म पनि गयो ।’ यसरी नै बिरामीको संख्या घट्दै गए सहज स्थिति हुने तर स्वास्थ्य मापदण्डमा चनाखो हुनुपर्ने उनको सुझाव छ ।
पश्चिमाञ्चल क्षेत्रीय अस्पताल र शिशुवामा रहेको संक्रामक तथा सरुवा रोग अस्पतालमा संक्रमणदर उच्च भएको समयमा सबैभन्दा बढी बिरामीको चाप हुन्थ्यो । संक्रामक तथा सरुवा रोग अस्पतालमा हाल बिरामी संख्या १४ रहेको संक्रामक तथा सरुवा रोग अस्पतालका कार्यकारी निर्देशक डा. विकास गौचनले जानकारी दिए । ‘पछिल्लो ३ हप्तामा भर्ना भएर बस्ने संक्रमितको संख्या निरन्तर ओह्रालो लागको छ,’ उनले भने, ‘अहिले आइसियुमा १, एचडियुमा ५ र जनरल वार्डमा ८ गरी १४ जना हुनुहुन्छ ।’ अस्पतालमा उपचार गराउनेको संख्या कम भएकाले प्रदेशका अन्य जिल्लाबाट पनि ल्याएर उपचार गर्ने विषयमा छलफल भइरहेको डा. गौचनले जानकारी दिए । ‘एकदुई जना बिरामी भर्ना गरेर राख्दा पिपिईलगायतमा खर्च एकदमै धेरै आउँछ,’ उनले भने, ‘त्यही कारण हाम्रो नियमित खर्च भइरहन्छ २०/३० जनामा एउटै खर्च हुन्छ । त्यही खर्चमा बाहिरको केसलाई पनि समेट्न सकिन्छ । त्यसैले मन्त्रालयमा कुरा भइरहेको छ ।’ अस्पतालमा अक्सिजनको माग पनि दैनिक १५/२० सिलिन्डरको हाराहारीमा पुगेको उनको भनाइ छ । अस्पतालमा उच्च संक्रमित ५४/५५ हुँदा दैनिक १ सय ५० सिलिन्डर अक्सिजन ग्यास खपत हुने गर्दथ्यो ।
संघ र प्रदेश सरकारबाट चलेका सरकारी अस्पतालमा मात्र नभएर पश्चिमाञ्चल सामुदायिक अस्पतालमा १४ बेड आइसोलेसन, ७ बेड आइसियु खाली छ । जहाँ १४ बेड आइसियु र ८ बेड आइसियु कोरोना बिरामीका लागि छुट्याइएको छ । सरकारले कोरोना उपचार रकम आधा व्यहोेर्ने सहमति गरेको गण्डकी मेडिकल कलेज र मनिपाल अस्पतालमा पनि संक्रमित न्यून छन् । गण्डकी मेडिकल कजेलमा ७६ बेड आइसोलेसनमा १९ प्रतिशतमात्र प्रयोग भएका छन् भने ३९ बेड आइसियुका लागि छुट्याइएकोमा ८० प्रतिशत बेड खाली नै छ । मणिपालको १२ आइसोलेसन बेडमा बिरामी छैनन् । २८ बेड आइसियुमा ६ प्रतिशतमात्र प्रयोगमा छन् ।
प्रदेश स्वास्थ्य निर्देशनालय, गण्डकीले दैनिक प्रकाशित गर्ने तथ्यांकमा पनि संक्रमितको संख्या ओह्रालो लागेको छ । गएको भदौ १० देखि १६ सम्म १ हप्तामा १ हजार ९ सय १४ जना संक्रमित भएका थिए । पछिल्लो १ हप्तामा १ हजार २४ जना संक्रमित भएका थिए । पछिल्लो दिन संक्रमितभन्दा कोरोना निको हुने संख्या बढ्दो छ । भदौ दोस्रो हप्तामा २ हजार हाराहारीमा संक्रमित हुँदा ३ हजार ७१ संक्रमणमुक्त भएका थिए । पछिल्लो १ हप्तामा १ हजार ४ सय ३८ जनाले कोरोना जितेका छन् । हाल गण्डकीमा १ हजार हाराहारीमा सक्रिय संक्रमित छन् ।
Related News
सम्बन्धित समाचार
कसको हातमा पर्ला वर्ष खेलाडीको उपाधि ?
गण्डकी प्रज्ञा–प्रतिष्ठानले ७ जना श्रष्टालाई सम्मान गर्दै
मुग्लिन–पोखरा सडक खण्डमा १३ वटा पुल सम्पन्न, ११ निर्माणाधीन
वर्ष खेलाडीको चर्चा
लान्द्रुकमा हनी हन्टिङ महोत्सव तयारी
hero news full width
मुख्य समाचार
प्रदेशमा सञ्चालित आयोजनाहरुको प्रगति विवरण २ दिनभित्र पेस गर्न मुख्यमन्त्रीको निर्देशन
गण्डकी सरकारविरुद्ध सर्वोच्चमा कांग्रेसले दर्ता गरायो रिट, पेसी पर्सि
वैशाख २५, २०८१सुरु भयो ट्राफिक सप्ताह, मुख्यमन्त्रीले गरे उद्घाटन
वैशाख २५, २०८१गण्डकीका सभामुखको कदमबारे मिश्रित प्रतिक्रिया
वैशाख २५, २०८१मुख्यमन्त्री अधिकारीले रोजे पुरानै मन्त्री
वैशाख २५, २०८१ट्राफिक सप्ताहको ब्यानरमा प्रदेशका मन्त्रीको शपथ !
वैशाख २४, २०८१