पोखरा । प्रजातन्त्र सेनानी स्व. नारायणदत्त–दुर्गाकुमारी रानाभाट स्मृति कोषबाट रक्त क्यान्सर पीडित दिप्तीलाई आर्थिक सहयोग प्रदान गरिएको छ । पोखरा ३१ मोहरियामा स्मृति कोषले दिप्तीका बुबा देवबहादुर सापकोटालाई २५ हजार ५ सय ५५ रुपैयाँको चेक स्मृति कोषका अध्यक्ष देवेन्द्र रानाभाटले हस्तान्तरण गरे ।
पोखरा २६ साँघुको मुखमा कार्यालय रहेको कोषमा ६ लाख ६६ हजार ६ सय रुपैयाँ रहेको छ । उक्त रकमको ब्याजबाट हरेक वर्ष १० जोड २ का उत्कृष्ट १ छात्र र १ छात्रालाई नगद, प्रमाण पत्र र दोसल्ला प्रदान गर्ने गरिएको छ भने दुर्गाकुमारी रानाभाट क्यान्सरकै कारण निधन भएको हुँदा हरेक वर्ष १ जना क्यान्सर पीडितलाई २५ हजार ५ सय ५५ रुपैयाँ सहयोग गर्दै आइरहेको अध्यक्ष रानाभाटले जानकारी दिए ।
१ असारदेखि क्षेत्रीय अस्पतालको बच्चा वार्डमा उपचार गराइरहेकी दिप्तीको उपचारमा सहयोग गर्न डा. रामचन्द्र बास्तोलाले आह्वान गरेका थिए । हाल दिप्तीको उपचार काठमाडौंको कान्तिबाल अस्पतालमा भइरहेको छ ।