हेमजा । अन्नपूर्ण गाउँपालिका ३ दमदमेमा १ घर १ धारा निर्माण गरिएको छ । गाउँपालिकाको आर्थिक सहयोग तथा स्थानीय जनसहभागितामा त्यहाँका कुल ४२ घरपरिवारमा धारा निर्माण गरिएको हो । गाउँपालिका अध्यक्ष युवराज कुँवरले धारा तथा क्रियाकर्म भवनको उद्घाटन गरे ।

गाउँपालिका अध्यक्ष कुँवरले पालिकावासीको दुख सुखमा गाउँपालिका सँगै रहेको भन्दै दमदमे पत्थर टोलले उदाहरणीय कार्य गरेको बताए ।

प्रमुख प्रशासकीय अधिकृत युवराज अधिकारीले एकतामा नै शक्ति हुने भन्दै त्यसको उदाहरण दमदमे पत्थर टोलले प्रस्तुत गरेको उल्लेख गरे ।

अन्नपूर्ण ३ का अध्यक्ष चन्द्रबहादुर गुरुङ, प्राविधिकद्वय पुण्यप्रसाद लामिछाने र हिमलाल दाहाल, वडा सदस्य रामजीप्रसाद पौडेल, कृषि समूहका अध्यक्ष नवीन गिरी, पत्थर मराउँचे काँडे ग्रामीण सडकका अध्यक्ष कृष्णप्रसाद अधिकारी, टोल संयोजक देव गिरी, खानेपानी तथा सरसफाइ उपभोक्ता समिति अध्यक्ष समुन्द्र गिरी, टोल सचिव विष्णुप्रसाद पौडेल लगायतले बोलेका थिए ।

खानेपानी योजनाका लागि १० लाख र क्रियाकर्म भवन बनाउँदा २ लाख खर्च भएको कोषाध्यक्ष डिल्लीराम पौडेलले जानकारी दिए ।