१. दोस्रो संविधानसभाको पहिलो बैठक बुधबार काठमाडौंको अन्तर्राष्ट्रिय सभाकक्षमा सम्पन्न भयो। संविधानसभाका ज्येष्ठ सदस्य सूर्यबहादुर थापाको अध्यक्षतामा त्यो पहिलो बैठक सम्पन्न भएको थियो। बैठकले संविधानसभाको बैठक बोलाउने नियमावली आदि पारित गरी समाप्त भएको थियो।

२. दोस्रो संविधानसभाको पहिलो बैठक भएकोले त्यो बैठक औपचारिकतामा सीमित रहेको थियो। सभाकक्षमा नयाँ र पुराना सभासद्को चिनजान र परिचय आदान-प्रदान भएको थियो भने नयाँ सभासद् बढी उत्साहित देखिन्थे। उनीहरूले एक वर्षभित्र संविधान बनाउने कुरा पटक-पटक दोहोर्‍याएका थिए।

३.     बैठकमा नेपाली काङ्ग्रेस र एमालेका सदस्यहरू बढी उत्साही देखिएका थिए भने एकीकृत माओवादीका सदस्यहरू निस्तेज प्रायः थिए। सभासद्मध्ये नयाँ महिला सदस्यहरू अलि बढी आफ्नो चाञ्चलयता प्रदर्शन गर्दै थिए भने युवा सदस्यहरू अस्वभाविक रूपले गम्भीर भएका थिए।

४. केही शीर्ष नेताहरू उत्साही भए पनि उनीहरूमा कुण्ठा देखिन्थ्यो। नेपाली काङ्ग्रेसका शीर्ष नेताहरू प्रधानमन्त्री बन्ने क्रममा के कसरी सभासद्हरूलाई आफ्नो पक्षमा ल्याउने भन्ने चिन्तामा रहेका देखिन्थे भने एकीकृत माओवादी नेताहरूको अनुहार आन्तरिक र बाह्य समस्यामा अल्भिmरहेको थियो।

५. उता मधेसी पार्टीहरू त्यसै पनि तडि्परहेका देखिन्थे। जातीय पार्टीहरूका केही सभासद्हरू हिजो जे जस्तो परिणामको आशमा थिए, त्यो नहुँदा उनीहरू भिजेको कुखुराझैं थिए। सभासद्हरू एक वर्षभित्र संविधान बनाउने कुरा रोबोटले भनेझैं यन्त्रवत् किसिमले भन्दै थिए। तर शीर्ष नेताहरूको विचार के छ, त्यो प्रष्ट थिएन।

६. हिजो पनि धेरै सभासद्हरू संविधान घोषणा गर्ने पक्षमा थिए। शीर्ष नेताहरूबीचको असमझदारी र सहमतिको अभावमा संविधान आउन सकेन। अहिले जनमतले केही सवक सिकाएको छ। जनमतले सिकाएको सवकलाई उनीहरूले के कति बुझेर व्यवहारमा अपनाउलान्, त्यो भोलिले देखाउने छ।

७. विशेषज्ञहरूले नेपालको संविधान विश्वको सबभन्दा महङ्गो संविधान हुने भएकोमा चिन्ता जाहेर गरिसकेका छन्। एउटा संविधान बनाउन अर्बौ रूपैयाँ खर्च हुने, ४/५ वर्षको समय लाग्ने कुरा साधारण होइन, त्यसमा पनि नेपालजस्तो गरिब देशको लागि सुहाउने कुरा होइन। यी सबै कुरालाई ख्याल गरी एक वर्षमा संविधान बनाउनुपर्नेमा हामी जोड दिन चाहन्छौं।