१. प्रधानमन्त्री न्यायाधीश सुशीला कार्कीले मंगलबार उमेर हदका कारण सवोर्च्च अदालतको आफ्नो पदबाट अवकास लिएकी छन्। उमेर हदका कारण अवकास हुनु सामान्य कुरा हो। तर सुशीला कार्की  जे जति चर्चित भएर प्रधान न्यायाधीश भएकी थिइन् र अवकासमा जानु अघि जे जसरी विवादित बनिन्, त्यसलाई साधारण र सामान्य भन्न मिल्दैन।

२. न्यायको क्षेत्रमा उनको छवि आफ्नै किसिमको थियो। उनी निडर, निर्भिक र निष्पक्ष न्यायाधीशका रुपमा गनिएकी थिइन्। उनको छवि आफ्नै किसिमको थियो। उनी सादगी जीवनले सरल जीवनको उच्च विचार भन्ने भनाई चरितार्थ गरेको देखिन्थ्यो। उनको कार्यकालमा न्याय निसाफ र भ्रष्टाचारको क्षेत्रमा केही परिवर्तन देखिएको थियो।

३. नेपालको इतिहासमा पहिलो महिला न्यायाधीश बनेकोमा पनि उनको चर्चा अत्यधिक भएको थियो। उनले महिलाहरुको हक हितको लागि के कति ठोस काम त्यो कुरा त्यत्ति चर्चा भएन। तर उनले एमालेको तर्फबाट एक पटक सभासद् भएकी सपना मल्ललाई सवोर्च्च न्यायाधीश बनाउनमा भने धेरै प्रयास गरेकी थिइन्।

४. उनको कार्यकालमा अदालतमा निश्चय नै केही सुधार भयो। भ्रष्टाचार घटेको चर्चा निकै सुनिएको थियो,। केही वकिलहरु उनको त्यस कार्यबाट असन्तुष्ट थिए र तिनीहरु मध्ये केहीले उनलाई बेला-मौकामा असहयोग गर्ने पनि गरे। तर पनि उनले त्यसलाई वास्ता गरिनन्।

५. उनले अख्तियार दुरुपयोग अनुसन्धान आयोगका प्रमुख लोकमान सिंह कार्की प्रकरणमा जे जस्तो फैसला गरिन् त्यसले उनको उचाइ निश्चय नै बढाएको थियो। आइजीपी प्रकरणले पनि उनी चर्चित भएकी थिइन्। उनले भ्रष्टाचार सम्बन्धमा केही सकारात्मक कदम चालेकी थिइन्। तर भ्रष्टाचारमा चुर्लुम्म डुबिरहेको राजनीतिक नेताहरुलाई सायद् त्यो सहज भएन।

६. सत्तारुढ काँग्रेस र माओवादी केन्द्रका सांसदहरुले उनी विरुद्ध व्यवस्थापिका संसदमा महाभियोग प्रस्ताव दर्ता गरे। उनी निलम्बनमा परिन्। पछि सवोर्च्चको आदेशबाट उनको निलम्बन फुकुवा भयो उनी कार्यालयमा उपस्थित भइन्। र पछि संसदले महाभियोग प्रस्ताब पनि फिर्ता लियो। तैपनि महाभियोग लागेको प्रधान न्यायाधीश भन्ने त भयो।

७. उनको कार्याकाल चुनौतीपूर्ण रह्यो। त्यो केही उनको स्वभावले गर्दा भयो भने केही पूर्वाग्रह र दुराग्रहले पनि भएको थियो। उनको कार्यकालमा सरकार र सवोर्च्च अदालत तथा सवोर्च्च र संसदबीचको सम्बन्ध सुमधुर रहेन। सहयोगी भावना रहेन। अझै भनौं परस्पर विरोधी भावना विकास भयो। सवोर्च्चमा उनको आगमन जति उत्साहपूर्ण थियो, उनको बहिर्गमन उति नै विवादास्पद  भयो। त्यो जे जस्तो भए पनि व्यक्तिगत रुपले उनी समक्ष कसैले औंला ठड्याउने स्थिति कहिले आएन। यो उनको विशेषता हो।