कोभिड–१९ बाट फेरि २ जनाको मृत्यु भएको समाचार सम्प्रेषण भएपछि त्यसले समाजमा भयको वातावरण सिर्जना गरेको छ । गत हप्ता २ जनाको मृत्यु भएको थियो । सरकारले २ हजार २ सय ९२ जनाको नमुना परीक्षण गर्दा ६ प्रतिशतभन्दा बढीमा कोरोना पुष्टि भएको जनाएको छ । एक महिनादेखि देशमा कोरोनाका संक्रमित देखिन थालेको थियो भने अहिले अस्पताल भर्ना हुनेको समेत बढ्दै गएको छ । संक्रमितलाई अस्पतालको आइसियु र भेन्टिलेटरमा समेत राखेर उपचार गरिरहेको काठमाडौंका अस्पतालहरूले पुष्टि गरेका छन् । स्थिति भयभीत बन्दै गएको छ । तर जनतालाई सजग र सतर्क पार्ने काम त्यत्ति भएको छैन । सरकारले अस्पताल आएकालाई औषधोपचार गर्ने काममात्र गरिरहेको छ ।

भारतमा एक महिना पहिलेदेखि नै यसको भेरियन्ट देखा परेको र त्यसले केहीलाई संक्रमित पारेको समाचार आएको थियो । त्यसको करिब १ सातापछि त्यो भेरियन्ट नेपालमा देखापरेको थियो । धनगढी र नेपालगन्ज भएर भारतबाट आएकाहरूमा यो संक्रमण देखिएको थियो । तर त्यहाँ रोगको के कस्तो अवस्था छ, त्यो प्रष्ट छैन । काठमाडौंमा भने संक्रमणको गति बढ्दै गएको छ र अस्पतालका शड्ढयाहरू कोभिड–१९ का बिरामीहरूले भर्दै गएको छ । अर्कोतिर जिल्लाहरूमा भने कोभिड–१९ को के–कस्तो अवस्था छ, त्यसको परीक्षण नै गरिएको छैन । न त सम्बन्धित पक्षहरूले सजग र सतर्क पार्ने प्रचारप्रसार नै गरेका छन् । सबै सामान्य एवं साधारण किसिमले नै हिँडडुल गरिरहेका छन् । युवकयुवतीहरू समूह–समूहमा घुमफिरका लागि यता–उता गइरहेका देखिन्छन् ।

कोरोना नेपालीका लागि नयाँ रोग होइन । अधिकांश नेपालीहरू यसका किटाणुसँग लडेका छन् । वैज्ञानिकहरूले यसको खोपको आविष्कार गरेपछि र त्यो खोप लगाएपछि मानिसहरूमा त्यो किटाणुसँग लड्ने शक्ति बढेको छ । खोपको मात्रा पूरा लगाएकाहरू वास्तवमा नै सबल र सक्षम भएको छ । त्यसको लागि वैज्ञानिकहरूलाई धन्यवाद दिनुपर्दछ । तिनीहरूले करिब १ वर्षभित्र नै कोभिड–१९ को खोपको आविष्कार गरे । संसार नै अन्धकार देख्नेहरूले पनि त्यो खोपको सहाराले उज्यालो देख्न थाले । मानिस बाँचन सकिन्छ भन्ने आशा पलायो । त्यसपछि यो रोगबाट मर्नेहरूको संख्या घट्दै गयो । एउटा चमत्कार भयो । तर अहिले फेरि संक्रमण देखिएको छ । पूर्ण खोप लगाएर बस्नु नै यसको अचुक उपाय हो । यसलाई फेरि एक पटक अभियानको रुपमा सञ्चालन गर्नु आवश्यक देखिन्छ ।