पोखरा–२७ डाँडाको नाकमा जारी लेखनाथ महोत्सवमा सोमबार रत्यौली र मारुनी नृत्यमा दर्शकहरु झुमेका छन् ।

विभिन्न विद्यालयका तर्फबाट विद्यार्थीका प्रस्तुतिका साथै विभिन्न आमा समूहले प्राचीन मौलिकतामा आधारित नृत्य लेखनाथ उद्योग वाणिज्य सङ्घको महोत्सवमा प्रस्तुत गरेका थिए ।

विद्यालयस्तरीय नृत्यअन्तर्गत लिटल फ्लावर एजुकेशनल एकेडेमी पोखरा–२७ रिट्ठेपानीद्वारा प्रस्तुत परम्परागत ‘पैसा झारे मारुनी’ अन्तर्गतको वारि तुवाँलो, पारि तुवाँलो बोलको गीतको नृत्यले महोत्सवस्थलको माहौल तताएको थियो । महोत्सवमा अमरज्योति गाउँफर्क मावि र लक्ष्मी माविका तर्फबाट पनि सांस्कृतिक नृत्य प्रस्तुत गरिएको थियो ।

त्यस्तै स्याङ्जाली तमु समाजको सांस्कृतिक नृत्य तथा नमूना आमा समूह पोखरा–२५ र खराने ताजा तरकारी कृषक समूह पोखरा–२६ को रत्यौली नृत्यले दर्शकका आकर्षित गरेको थियो । लोकदोहोरीतर्फ प्रजापति पराजुली, कृष्ण रेउले, चोलेन्द्र पौडेल, प्रदीप त्रिपाठी, सीता केसी, मञ्जु विक, काजल गुरुङ, माया गिरीलगायतका कलाकारको प्रस्तुति थियो भने हाँस्यतर्फ चक्लेटी र दारी बाको प्रस्तुति थियो ।