पोखराको प्रसिद्ध धार्मिक शक्तिपीठ विन्ध्यवासिनी मन्दिरमा पूजारीलाई तलबमा नियुक्ति गरेपछि एकै वर्षमा २ करोड ७० लाख आम्दानी भएको छ।

मन्दिरमा भक्तजनले चढाएको भेटीमा वषौर्देखि पूजारीको हकभोग रहँदै आएकोमा अघिल्लो वर्ष विन्ध्यवासिनी धार्मिक क्षेत्र विकास समितिले पूजाआजा गदै आएका पूजारीलाई करार सम्झौता गरी मासिक तलबमा नियुक्त गरेर भेटी आफै सङ्कलन गर्न शुरु गरेको थियो।

शुरुमा समितिको निर्णयविरुद्ध अदालत पुगेका पूजारी आफ्नो पक्षमा अदालतको निर्णय नआएपछि बाध्य भएर मासिक तलब लिने गरी काम गर्न तयार भएका थिए। सरकारले विसं २०७२ कात्तिक २ गते मठमन्दिरका भेटी व्यवस्थापन निदेर्शिका जारी गरेर मठमन्दिरको भेटी मन्दिर धार्मिक क्षेत्र विकास समितिको मातहतमा ल्याउन शुरु गरेको थियो।

झण्डै २ सय वर्षबाट विन्ध्यवासिनी मन्दिरमा भेटीवापत सङ्कलन हुने नगद तथा जिन्सी पूजारीले लिने गरेका थिए। भेटी व्यवस्थापन निदेर्शिका अनुसार समितिले विन्ध्यवासिनी तथा गणेश मन्दिरमा दैनिक पूजाआजा सञ्चालन गर्न १५ जना पूजारीलाई करार नियुक्त गरेको छ।

पूजारीबाट भेटी समितिको मातहतमा आएको पहिलो आर्थिक वर्ष २०७५/७६ मा समितिको ३ करोड आम्दानी भएकोमा २ करोड ७० लाख भेटीबापत र बाँकी मन्दिरको सटर भाडालगायतको रहेको समितिका सचिव तीर्थ श्रेष्ठले बताए। पूजारीले मासिक १५ देखि ३५ हजारसम्म तलबमा काम गदै आएको बताइन्छ।

मन्दिरमा दर्शनार्थीले श्रद्धाले चढाउने भेटीबापतको नगद तथा सुनचाँदीमा समितिको पहुँच नहुँदा मन्दिरमा पूर्वाधार निर्माण लगायतका कार्य गर्दा सहयोगीको हात थाप्नुपर्ने बाध्यता रहेकोमा हाल मन्दिरको आम्दानी वृद्धि भएपछि समितिले आफ्नै स्रोतमासमेत निर्माणका काम गरेको श्रेष्ठले बताए।

उनले भने, ‘विगतमा हाम्रो आम्दानीको स्रोत थिएन। पूजा सञ्चालन गर्न पनि सहयोगको हात थाप्नुपर्ने अवस्था थियो। अहिले मन्दिरमा चढेको भेटिबाट मन्दिर परिसरमा सुधारका काम गरेका छौं। ’ विसं २०४३ मा स्थापना भएको समितिले शिव मन्दिर, राधाकृष्ण मन्दिर, सन्त निवास, विन्ध्यवासिनी गुरुकूल विद्याश्रम भवन, बहुउद्देश्यीय सभाहल, अखण्ड हबन मण्डप, अष्टचिरञ्जीवी नवग्रह मन्दिर तथा यज्ञ मण्डपको निर्माण गरिएको समितिका अध्यक्ष गणेशबहादुर श्रेष्ठले बताए।

त्यसैगरी मन्दिर परिसरमा ढुङ्गा छाप्ने, जलधारा, कीर्तिस्तम्भ, विशाल त्रिशूल र शक्ति ध्वजाको स्थापनाका साथै विन्ध्यवासिनी र गणेश मन्दिरमा पित्तलद्वारा कलात्मक सजावट र पित्तलकोद्वार निर्माण गरिएको समितिले जनाएको छ। विन्ध्यवासिनीमा वैदिक गुरुकूल विद्याश्रम भवन तथा विन्ध्यवासिनी प्राकृतिक चिकित्सालयको शिलान्यास भएर काम भइरहेको छ।

मन्दिर परिसरमा ज्येष्ठ नागरिक, अशक्त तथा असाहायको लागि विद्युतीय भर्याङ सञ्चालनमा ल्याइएको छ। गतवर्ष फागुनमा राष्ट्रपति विद्यादेवी भण्डारीले भर्याङ शुभारम्भ गरेपछि ज्येष्ठ नागरिकलेसमेत सहज रुपमा मन्दिर दर्शन गरेका छन्।

समितिले ७० वर्ष माथिका नागरिक, अपाङ्ग, अशक्त तथा गर्भवती महिलाका लागि निःशुल्क भर्याङको व्यवस्था गरेको छ भने नेपालीका लागि ५० र विदेशीका लागि १ सय रुपैयाँ लिने गरेको छ।

यसैबीच, विन्ध्यवासिनी मन्दिर परिसरमा यसवर्ष पनि नवदुर्गा महोत्सव तयारी गरिएको छ।