पोखरा । अन्तराष्ट्रिय क्रिकेट परिषद, आईसीसीको एकदिवसीय क्रिकेटको नयाँ वरियतामा नेपाल एक स्थान तल झरेको छ ।

आइसीसीले बिहिबार सार्वजनिक गरेको नयाँ वरियतामा नेपाल एक स्थान तल झर्दै १५ औं स्थानमा रहेको छ । नयाँ वरियतामा नेपालले १५२ अंक पाएको छ । यसअघि नेपाल १४ औं स्थानमा थियो । टी–ट्वान्टी वरियतामा भने नेपाल ११ औं स्थानमा छ ।

आइसीसीबाट एकदिवसीय अन्तराष्ट्रिय मान्यता पाएर संयुक्त अरब इमिरेट्स, युएईविरुद्धको तीन खेलको एकदिवसीय सिरिज खेलेपछि नेपाल वरियतामा पर्न थालेको हो । गत माघमा भएको उक्त सिरिज नेपालले २–१ ले जितेको थियो । युएईसँगको सिरिजपछि नेपालले अन्य एकदिवसीय खेल खेलेको छैन ।

वरियतामा नेपाल भन्दा तल युएई र पपुवा न्युगिनी रहेका छन् । नयाँ वरियताको शीर्ष स्थानमा भारत, दोस्रोमा इङ्ल्याण्ड र तेस्रो स्थानमा न्यूजिल्यान्ड छ । चौथोमा अष्ट्रेलिया र पाँचौमा दक्षिण अफ्रिका रहेको छ । एकदिवसीय खेलाडी वरियतामा नेपालका कुनैपनि खेलाडीले शीर्ष सयभित्र स्थान बनाउन सकेका छैनन् ।