पोखरा । बुहारी सशक्तीकरण समाज पोखराले मानवसेवा आश्रममा न्यानो लुगा तथा नगद हस्तान्तरण गरेको छ । संस्थाका सदस्यहरूबाट संकलित ७ हजार ५५ रुपैयाँ तथा केही थान न्यानो लुगा हस्तान्तरण गरिएको हो । सोही अवसरमा शुभकामना बचत तथा सहयोगी समूह पोखरा ३० ले पनि नगद २५ सय रुपैयाँ प्रदान गरेको थियो ।

बेसाहारा सडक मानवलाई सहारा दिएर गास, बास र कपासको सुविधा दिने मानवसेवा आश्रममा आफूले खाने गास घटाएर भएपनि सहयोग गर्दै आएको बुहारी सशक्तीकरण समाजका कार्यसमिति सदस्य तथा शुभकामना बचत तथा सहयोगी समूहका सचिव सुनिता खत्रीले बताइन् ।

समाजमा ठूलो हिस्सा ओगटेका बुहारी वर्गलाई एकताबद्ध बनाएर सीपमूलक तालिम र नेतृत्व विकासका कार्यक्रम गर्ने तथा मानवसेवा र समाजसेवामा समर्पित गराउने उद्देश्यले बुहारी सशक्तीकरण समाज गठन भएको समाजका अध्यक्ष निर्मला केसीले बताइन् ।

चुलोचौकोमा सिमित बुहारीहरु अवसर पाए आत्मनिर्भर र परोपकारी कार्यमा योगदान दिन सक्छन् भन्दै केसीले आयआर्जन र उद्यमशीलतामा लाग्न आह्वान गरिन् । मानवसेवामा समर्पित संस्था तथा व्यक्तिहरूको सहयोगले नै आश्रममा रहेका दर्जनौं बेसाहारा व्यक्तिलाई साहारा मिलेको बताउँदै आश्रमका व्यवस्थापक सम्झना बर्ताैलाले धन्यवाद व्यक्त गरिन् ।

मानवसेवा आश्रम छोरेपाटनमा ७० जना महिला तथा बालिका आश्रित छन् भने हेम्जा शाखामा १ सय २३ जना पुरुष तथा बालक आश्रित छन् । बौद्धिक अपांगता भएर सडकमा छाडिएका अधिकांश आश्रतिहरूलाई उद्दार गरी आश्रममा व्यवस्थापन गर्न कठिनाइ भएपनि उनीहरूको सेवामा आफूहरू समर्पित रहेको त्यहाँका समर्पित अभियन्ताहरूले बताउँछन् ।