पोखरा । पोखरा महानगर वडा नम्बर १ को आर्थिक सहयोग तथा आवजविहीन जनताको साथी पोखराको आयोजनामा पोखरा १ मा बसोबास गर्ने अपांगता भएका व्यक्तिहरूलाई हर्पिक तथा फिनेल उत्पादन तालिम दिइएको छ । तालिममा अपांगता भएका व्यक्ति तथा उनीहरुका सहयोगी गरी ३० जनाको सहभागिता रहेको आवजविहीन जनताको साथीका सचिव श्रीकान्त सापकोटाले जानकारी दिए । तालिममा दृष्टिविहीन उद्यमी सुशील गोदारले सहजीकरण गरेका थिए ।

तालिम उद्घाटन गर्दै पोखरा १ का वडाध्यक्ष साहारा प्रधानले आगामी वर्ष अपांगता भएका व्यक्तिहरूको तथ्यांक अद्यावधिक गरी थप कार्यक्रम राख्ने प्रतिबद्धता जनाए ।
संस्थाका अध्यक्ष शोभा पौडेलको अध्यक्षतामा भएको कार्यक्रममा प्रशिक्षक सुशील गोदार, संस्कृत माविका प्रधानाध्यापक श्रीकृष्ण सिग्देल, वडा सदस्यहरू शोभा गुरुङ, जुगमाया दमाई, जुमकाजी गुरुङलगायतले मन्तव्य राखेका थिए ।