पोखरा । गण्डकी प्रदेश सभाको बैठक बिहीबार केहीबेरका लागि स्थगित भएको छ । आजबाट बजेटमाथि छलफल सुरु भएको छ । प्रमुख प्रतिपक्षी दल नेकपा एमालेले आम्दानी र खर्चको हिसाब नमिलेको बताएको थियो ।

एमाले संसदीय दलका उपनेता लीलबहादुर थापाले आम्दानी र खर्चको हिसावमा करिब ९६ करोड अपुग भएको औंल्याएका थिए । उनको भनाइपछि विशेष समय माग गरे प्रमुख सचेतक गोविन्दबहादुर नेपालीले यसमा सरकारको उत्तर चाहियो भनेका थिए ।

त्यसलगत्तै सभामुखले सरकारको के छ तयारी भनेर सोधे । अनि अर्थमन्त्रीतिर पनि संकेत गरे । मुख्यमन्त्री र मन्त्रीहरु अलमलमा परे । के गर्ने के भन्ने जस्तो भयो । कांग्रेसकै सांसदहरु अर्थमन्त्रीले रोस्टममा गएर जवाफ दिनुपर्ने भन्दै संकेत गरिरहे । तर अर्थमन्त्री उठेर रोस्ट्रममा गएनन् ।

त्यसपछि सभामुख कृष्णप्रसाद धितालले सभा १० मिनेटका लागि स्थगित गरेका छन् ।