फेवाबाट जलकुम्भी हटाउन अभियान सुरु

आदर्श समाज सम्वाददाता
वैशाख ३०, २०८१
jalalumbhi

पोखरा । बर्खा सुरुभएसँगै फेवाताल जलकुम्भीले ढाकिन्छ । स्वदेशी र विदेशी पर्यटकको आकर्षणको केन्द्र फेवाताल भए पनि यसको संरक्षणका लागि दीर्घकालीन योजना भने स्थानीय सरकारले ल्याउन सकेको छैन । मानवीय र प्राकृतिक अतिक्रमणको चपेटामा परेको फेवाको अर्का टाउको दुखाइ हो जलकुम्भी झार ।

त्यसो त हिउँदकै बेलामा जलकुम्भीको स्रोतमै सरसफाई गरी बिउ निमिट्यान्न पार्नुपर्ने हो, तर त्यतातिर सरोकारवालाको ध्यान भने गएको देखिँदैन । यदाकदा भएका प्रयासले पनि सार्थकता पाएको छैन ।

यसैबीच आइतबारबाट फेवाताल सरसफाई अभियान सुरु गरिएको छ । पोखरा–१८ खपौदी ढल्केबरबाट वातावरण संरक्षणका लागि जलकुम्भी सरसफाई अभियान थालिएको हो । महाअभियान कास्कीको आयोजनामा ‘वातावरण एवं सम्पदा संरक्षणमा नागरिक खबरदारी’ नाराका साथ अभियान थालिएको अभियन्ता रामबहादुर पौडेलले बताए ।

कार्यक्रममा सशस्त्र प्रहरी बल नम्बर २४ कालिका गणका गणपति एसपी अरुण पौडेल शर्माले अभियानको थालनी गरे । उनले तालतलैया लगायत प्राकृतिक स्रोत, सम्पदा र सम्पत्तिको संरक्षण गर्नु सबैको साझा दायित्व रहेको बताए ।

अभियन्ता पौडेलका अनुसार सोमबारदेखि जलारी समुदायले ज्यालासहित जलकुम्भी सरसफाइ अभियानलाई निरन्तरता दिनेछन् । अभियान्ता पौडेलका अनुसार भोलिबाट हरेक दिन बिहान ८ बजेदेखि दिउँसो ३ बजेसम्म ४० जनाका दरले स्थानीय जलारी समुदाय जलकुम्भी सफाइमा जुट्ने छन् । पोखरा महानगरपालिकाको सहयोगमा १ जलारी घर १ रोजगारी कार्यक्रम अन्तर्गत यो अभियान सञ्चालन गरिएको हो । उनले अभियानको पहिलो दिन १५ ट्रिप्पर जलकुम्भी हटाइएको बताए ।

पहिलो दिन सशस्त्र प्रहरी, नेपाली सेना, महानगरीय प्रहरी, स्थानीय आमा समूह, नागरिक समाज, रेबान, सामाजिक संघसंस्था, पत्रकारहरुले सरसफाइमा भाग लिएको पोखरा महानगरपालिका ६ का वडाध्यक्ष विष्णुबहादुर भट्टराईले जानकारी दिए । पहिलो दिनको कार्यक्रम समापन वडाध्यक्ष भट्टराईले गरेका थिए ।

पोखराको फूलबारीबाट सुनसरी स्थानान्तरण भएको भगवती दल गण र सुनसरीबाट फूलबारी आएको श्रीकृष्ण दलका ३ सयभन्दा बढी सेना सरसफाइमा सहभागी भए । सशस्त्र प्रहरी गण मालेपाटनका २ सयभन्दा बढी सशस्त्र प्रहरी र सर्वसाधारण नागरिक गरी कार्यक्रममा ७ सयभन्दा बढीको सहभागिता थियो ।

Related News

सम्बन्धित समाचार

hero news full width

trending post

ट्रेन्डिङ्ग