पोखरा । लामागाउँले प्रथम खुला सेभेन साइड फुटबल प्रतियोगिताको उपाधि जितेको छ । मंगलबार फाइनलमा रामघाट एफसीलाई सडनडेथमा हराउँदै उपाधि चुमेको हो । उसले उपाधिसहित १ लाख जितेको छ । उपविजेता रामघाटले ६० हजार रुपैयाँ प्राप्त गर्‍यो ।

एट टु नाइन गाइज आयोजनामा भएको प्रतियोगिताको अत्यन्तै प्रतिस्पर्धात्मक फाइनलको निर्धारित समयको खेल १/१ गोलको बराबरीपछि खेल टाइब्रेकरमा धकेलिएको थियो । टाइब्रेकरमा समेत २/२ गोलको बराबरी भएपछि खेलको टुंगो सडनडेथबाट लागेको हो ।

रामघाटका विशन गुरुङ सर्वोत्कृष्ट खेलाडी घोषित भए । लामागाउँका अनुज भण्डारी उच्च गोलकर्ता (४ गोल) घोषित भए । सोही टिमका अञ्जन क्षत्री उत्कृष्ट गोलरक्षक घोषित भए । उनी फाइनलको म्यान अफ दी म्याच समेत घोषित भए । फेयर प्ले माछापुच्छ«े त्रिशक्ति युनाइटेड घोषित भयो ।

यसअघि सेमिफाइनलमा लामागाउँले बि–१३ र रामघाटले गन्नी एफसीलाई हराउँदै फाइनल प्रवेश गरेका थिए । प्रतियोगितामा ३९ टिमले भाग लिएका थिए । प्रतियोगिताको समापनमा सेभेन ए साइड महासंघ अध्यक्ष नवीन पुन, गण्डकी प्रदेश खेलकुद परिषद सदस्य विनय थापा, टेकबहादुर गुरुङ लगायतले पुरस्कार प्रदान गरे ।

रग्बी खेलाडी यशोदा बोहोरालाई अर्थिक सहयोग गर्न प्रतियोगिताको आयोजना गरिएको प्रतियोगिता संयोजक लोक गुरुङले बताए । यशोदा यु–२० एसिया रग्बी सेभेन्सको तयारीको प्रशिक्षणका दौरान घाइते भएकी थिइन् । उनी यु–१५ साफ महिला फुटबल च्याम्पियनसिपमा नेपालले स्वर्ण जितेको टोलीकी सदस्य पनि हुन् । प्रतियोगिताबाट बचत भएको रकम यशोदालाई प्रदान गरिने गुरुङले बताए ।