पोखरा । देशभरका महिला उद्यमी संघलाई उछिन्दै कास्की जिल्लास्थित महिला उद्यमी संघ कार्यसम्पादनका आधारमा नेपालमै प्रथम हुन सफल भएको छ ।

महिला उद्यमी महासंघ नेपालको २० औं वार्षिक साधारणसभा तथा ९ औं महाधिवेशनका बीच काठमाडौंमा शुक्रबार आयोजित कार्यक्रममा शाखालाई नगद १५ हजारसहित प्रशंसापत्रले सम्मान गरिएको हो ।

उद्योग वाणिज्य तथा आपूर्ति मन्त्री रमेश रिजालसहित महासंघका अध्यक्ष नीरु रायमाझी खत्री, महासचिव महालक्ष्मी श्रेष्ठ, जिल्ला विस्तार समिति संयोजक सुनिता वैद्य श्रेष्ठ लगायतको टोलीले संयुक्त रुपमा पुरस्कार प्रदान गरेको हो ।

पुरस्कार ग्रहणमा संघ कास्की अध्यक्ष शारदा बराल, निवर्तमान अध्यक्ष पार्वती पौडेल रेग्मी, प्रथम उपाध्यक्ष एलिना बराललगायत निवर्तमान प्रथम उपाध्यक्ष प्रतिभा गैरे सहभागी थिए ।

संघका अध्यक्ष बरालले पुरस्कारले आफूहरूलाई हौसला थपेको उल्लेख गर्दै कास्कीमा स्वरोजगार महिला वृद्धि गर्न आगामी दिनहरूमा पनि सक्दो पहल लिने उल्लेख गरिन् ।

संघले यसअघि पनि २ पटकसम्म प्रथम, १ पटक दोस्रो साथै २ पटक सान्त्वना पुरस्कार प्राप्त गरेको थियो ।

२०६६ सालमा ९ जनाबाट सुरु गरेको संघ कास्की शाखामा हाल १ सय ९४ जना महिला सदस्य छन् । महिला उद्यमी महासंघले हालसम्म ६१ जिल्लामा शाखा विस्तार गरेको छ ।