पोखरा । तीन वटा पालिका जोड्ने चक्रपथ । १ करोड बजेट । न पालिकासँग समन्वय छ, न बजेट कार्यान्वयनको मापदण्ड छ । नवलपुरको मध्यविन्दु, हुप्सेकोट र कावासोती पालिका जोड्ने उक्त चक्रपथ कार्यान्वयनको चरणमै नजाने लगभग निश्चित छ । मध्यविन्दुका मेयर भीमलाल अधिकारी स्थानीयको आवश्यकता विपरीत योजना परेकोले कार्यान्वयनमा समस्या परेको गुनासो गर्छन् ।
‘तीनवटा पालिकाको नाम जोडेर गाउँको बाटोजति सबै भ्याएर १ करोड पैसा हाल्देको छ । यो कहाँ लगानी गर्ने हो ? सिफारिस कुन पालिकाले दिने हो ?,’ उनले प्रश्न गरे, ‘कि तीनवटै पालिकाले भागबण्डा गरेर कार्यान्वयन गर्नुपर्यो । नत्र कसरी काम हुन्छ ?’ स्थानीय पालिकाका मागभन्दा अन्यत्रबाटै योजना हाल्ने परम्परा विकासको बाधक भएको उनी सुनाउँछन् ।
‘स्थानीयका समस्या एकातिर छ । बजेट अर्कोतिर पर्छ । स्थानीय सरकारको माग अनुसार प्रदेश र संघको बजेट विनियोजन हुनुपर्ने हो । व्यक्तिगत रुपमा एसएमएसबाट नातावादका आधारमा योजना परेको छ । अत्ति नै भयो,’ उनी भन्छन्, ‘एउटै बाटोमा तीनवटा योजना छ । तीनतिरबाट ५/५ लाखका बजेट छन् । एउटा उत्तरतिरबाट योजना परेको छ, अर्को दक्षिणतिरको छ, अर्को बीचतिरबाट हालेको छ ।’
नेपालको १६ औं तथा गण्डकीको दोस्रो पञ्चवर्षीय योजना तर्जुमाको सुरुआती छलफलका क्रममा गण्डकीका स्थानीय सरकार प्रमुखहरुले योजना मात्रै बन्ने र कार्यान्वयन फितलो भएको गुनासो गरेका छन् । संघ र प्रदेशले खल्तीका योजना हालेका कारण पञ्चवर्षीय योजनाको औचित्य नरहेको उनीहरुको तर्क छ । भीमाद नगरपालिकाका मेयर दधिराज सुवेदीले पहुँचका भरमा खल्तीका योजनामा बजेट हाल्दा स्थानीय तहका प्राथमिकता विपरीतका कार्यक्रम समेटिएका बताए । ‘पकेटमा लिष्ट लिएर जाने र मन्त्री तथा सांसदका लिष्ट अनुसारका योजना परेको छ । एउटा बाटोलाई १४१ र १४२ शीर्षकमा बजेट हालिएको छ ।
कुश्मा नगरपालिकाका मेयर रामचन्द्र जोशी भनसुनका आधारमा पठाइने योजना र कार्यक्रमका कारण दीगो विकास लक्ष्य र पञ्चवर्षीय योजनाहरु कार्यान्वयनमा नगएको बताउँछन् । ‘अनुदान १ करोड दिन्छ, त्यही पनि पालिकाले नपठाएका योजनामा पर्छ,’ उनले भने, ‘सचिव र मन्त्रीका खल्तीबाट योजना पठाउने हो भने पञ्चवर्षीय योजना बनाएको के अर्थ ?’ उनले संघ, प्रदेश र स्थानीय सरकारबीच तालमेल नमिलेको गुनासो गरे । ‘असार २३ गते बजेट पठाउँछ, २५ गतेबाट खाता बन्द हुन्छ,’ उनले भने, ‘दुई दिनमा के काम गरेर फरफारक गर्ने हो ?’ जिल्लास्तरमा स्थापना भएका प्रदेशका कार्यालय खारेज हुनुपर्ने उनको तर्क छ । यो गुनासो जोशीको मात्रै होइन, अधिकांश पालिकाका जनप्रतिनिधिहरुको साझा हो ।
सुन्दरबजार नगरपालिकाका मेयर कृष्ण कोइरालाको अनुभव पनि तितै छ । खल्तीबाट योजना हाल्ने परिपाटीको अन्त्य हुनैपर्ने तर्क गर्छन् उनी । ‘वडाध्यक्षले योजनामा हस्तक्षेप गरेपछि सदस्यहरुले नगरसभामा आफ्नो भुमिका खोजे । हामी वडा सदस्यहरु तपाईंको कोरम पुर्याउन मात्रै आउने भनेर प्रश्न गरे । खल्तीबाट योजना हाल्ने परम्पराको अन्त्य जबसम्म गर्दैनौं, तबसम्म व्यवस्थित विकासको परिकल्पना गर्न सकिँदैन ।’ प्रदेश नीति तथा योजना आयोगले आयोजना गरेको अन्तरक्रिया कार्यक्रममा नगरपालिकाका मेयर र गाउँपालिकाका अध्यक्षहरुले संघ र प्रदेशमाथि औंला उठाए ।
उनीहरुले योजना निर्माण यथार्थपरक, व्यावहारिक र कार्यान्वयनयोग्य हुनुपर्नेमा जोड दिए । गाउँपालिका राष्ट्रिय महासंघकी अध्यक्ष तथा हुप्सेकोट गाउँपालिका अध्यक्ष लक्ष्मी पाण्डेले पञ्चवर्षीय योजनाले दिगो विकासको आधार तय गर्नुपर्ने बताइन् । योजना तर्जुमादेखि कार्यान्वयनसम्म तीनै तहका सरकारबीच समन्वय र सहकार्य हुनुपर्ने उनको भनाइ छ । ‘योजनाहरु यथार्थपरक हुनुपर्छ । नागरिकको दैनिकीलाई छुने हुनुपर्छ,’ उनले भनिन्, ‘आवधिक योजना बौद्धिक दस्तावेज होइन । कार्यान्वयनको पुस्तक हो । प्राकृतिक स्रोत संरक्षण र उपभोगका मुद्दा पनि समेटिनुपर्छ ।’
आवधिक योजना बौद्धिक दस्तावेज होइन । कार्यान्वयनको पुस्तक हो
उनले योजनाको छनोटदेखि बजेट निर्माणसम्मको ‘ट्रेण्ड’ सही नभएको बताइन् । प्रदेशको पञ्चवर्षीय योजनाले लिएका अधिकांश लक्ष्यहरु कार्यान्वयनमै गएका छैनन् । पहिलो ५ वर्षमा सक्ने गरी २३ वटा प्रदेश गौरवका योजना र ५ वटा रुपान्तरणकारी परियोजना छनोट गरेको प्रदेश सरकारले कार्यान्वयनको अन्तिम वर्षमा आइपुग्दा एउटा योजना पनि पूरा गरेको छैन । यसको प्रमुख कारक कोरोना महामारीलाई लिइएको छ ।
पूर्व मुख्यसचिव डा. सोमलाल सुवेदीले तीनै तहका सरकारले लगानी प्रक्षेपण र योजनाको छनोट यथार्थपरक नभएको बताउँछन् । ‘उद्देश्य महत्वकांक्षी राख्ने तर काम चाहिँ नदेखिने भैरहेको छ । लोकप्रियताका लागि मात्रै योजनाहरु बनेका छन्,’ उनी भन्छन्, ‘आफ्नो समाथ्र्य खोज्नुपर्यो । सबैको प्राथमिकता सडक मात्रै भएको छ । आगामी योजनाहरु संघीयता अनुकुल बनाउनुपर्यो ।’
जिल्ला समन्वय समिति महासंघ गण्डकीका अध्यक्ष लीलाधर पौडेलले तीनै तहका सरकार सुशासनका क्षेत्रमा चुकेको बताए । ‘सुशासनमा हाम्रो ठूलो कमजोरी छ । विगतका कमजोरीबाट सिकेर दीगो विकास लक्ष्य हासिल गर्ने गरी आगामी पञ्चवर्षीय योजना तय गर्नुपर्छ,’ उनले भने । नियमित विकास कार्यक्रमसँगै रुपान्तरणकारी योजनामा समेत जोड दिनुपर्ने उनको भनाई छ ।
पोखरा महानगरको सहरी योजना आयोगका उपाध्यक्ष प्रेम लामिछानेले नेपालको अर्थव्यवस्था कस्तो हुने भन्ने विषयलाई आवधिक योजनाले दिशानिर्देश गर्नुपर्ने तर्क गरे । चालु खर्च बढ्दै जाने र पुँजीगत खर्च खुम्चिँदै गएकोमा उनको चिन्ता छ । मनाङको नासों गाउँपालिकाका अध्यक्ष धनबहादुर गुरुङ पालिकाभित्रका प्राकृतिक स्रोत उपयोगको विशेष नीति अख्तियार गर्नुपर्ने सुझाउँछन् । ‘हाम्रो क्षेत्रभित्रका सबै राजश्व एक्यापले लैजान्छ । यार्सागुम्बाबाट राम्रो राजश्व उठ्छ तर त्यसमा हाम्रो अधिकार छैन । हाम्रो वार्षिक आन्तरिक आम्दानी २५ लाख पनि हुँदैन,’ उनले भने, ‘विकाससँगै राजश्व बढाउन पनि हामीले सोंच्नुपर्छ ।’
तनहुँको आँबुखैरेनी गाउँपालिकाका अध्यक्ष शुक्र चुमानले योजनाहरु राम्रा बनेपनि कार्यान्वयन नभएकोमा ध्यानाकर्षण गराए । ‘पन्ध्रौं पञ्चवर्षीय योजनाको समीक्षा कस्तो छ ? के कारणले कार्यान्वयन भएन ? कार्यान्वयनको स्थिति कस्तो छ ?,’ उनले भने, ‘हाम्रा मन्त्री र सचिवले वार्षिक नीति तथा कार्यक्रम र बजेट बनाउँदा आवधिक योजना पल्टाएर हेरेका छन् ? हाम्रो लक्ष्य एकातिर छ, व्यवहार अर्कोतिर छ ।’ उनले शिक्षा र स्वास्थ्यमा विशेष जोड दिनुपर्ने र गाउँमै नागरिकलाई टिकाइराख्ने कार्यक्रम ल्याउनुपर्ने सुझाव दिएका छन् ।
गण्डकीका नीति तथा योजना आयोगका उपाध्यक्ष डा कृष्णचन्द्र देवकोटाले छलफबाट आएका सुझावलाई राष्ट्रिय योजना आयोगमा पठाइने बताए । ‘केन्द्रका सुझाव केन्द्रमा पठाउछौं, प्रदेशको हामीले नै राख्छौं,’ उनी भन्छन्, ‘दोस्रो आवधिक योजनाका लागि प्रारम्भिक छलफल सुरु भएको छ ।’ अब ११ वटै जिल्लामा पुगेर सुझाव संकलन गर्ने र यथार्थपरक योजना निर्माण गरिने उनले सुनाए । ‘अति महत्कांक्षी पनि हुँदैनौं । साह्रै निराश हुन पनि भएन,’ उनी अघि भन्छन्, ‘प्रदेशको स्रोत र हैसियत हेरेर कार्यान्वयन योग्य पञ्चवर्षीय योजना निर्माण गर्छौं ।’ आगामी पञ्चवर्षीय योजनाका लागि कृषि, उर्जा, पर्यटन, जसांख्यिक लाभ, प्राकृतिक स्रोत, पूर्वाधार, सूचना प्रविधि, वैदेशिक रोजगारी र विप्रेषण, शहरीकरण र बृहत संजालीकरण, निजी क्षेत्र र सहकारीलाई रुपान्तरणका प्रमुख संवाहक मानिएको छ । सहभागीहरुले विकाससँगै निम्तिन सक्ने विनासबारे पनि सचेत रहन कार्यक्रम ल्याउनुपर्ने राय दिएका छन् ।
Related News
सम्बन्धित समाचार
उषा र प्रकाश पोखरा साइकल दौड च्याम्पियन
पोखरा सिँगार्न दिनहुँ श्रमदानमा खटिन्छन् सीताराम
पोखरा–१२ का सामुदायिक विद्यालयमा संस्कार शिक्षा
मुग्लिन–पोखरा सडक पूर्वी खण्डको म्याद थपियो
फेवाको मापदण्ड घटाउन सर्वोच्चमा रिट
hero news full width
मुख्य समाचार
सहकारीका विकृति राजनीतिकर्मीका लागि चुनौती : मुख्यमन्त्री अधिकारी
पर्वत र बागलुङका सिडिओ फेरिए
जेठ ४, २०८१जनप्रिय क्याम्पस प्रमुखमा रमेशबहादुर खड्का
जेठ ४, २०८१धानको लोपोन्मुख प्रजाति संरक्षण गरिँदै
जेठ ४, २०८१गण्डकीमा थुप्रिए रुग्ण र समस्याग्रस्त योजना
जेठ ४, २०८१सराङकोटमा सहिद स्मृति भवन निर्माण
जेठ ३, २०८१