पोखरा । नवौं राष्ट्रिय खेलकुदअन्तर्गत महिला क्रिकेटमा घरेलु टोली गण्डकी प्रतियोगिताबाट बाहिरिएको छ ।

लिग चरणका कुनै पनि खेलमा दर्शनीय खेल प्रस्तुत गर्न नसकेपछि गण्डकी बाहिरिएको हो । शनिबार अन्तिम खेलमा बागमती प्रदेशसँग ३० रनले पराजित भएसँगै नवौंको यात्राबाट बिट मारेको हो ।

खेलमा पहिला व्याटिङ गरेको बागमतीले २० ओभरमा ८८ रनको योगफल तयार पारेको थियो । प्रत्युत्तरमा गण्डकीको पारीमात्रै ५८ रनमा समेटियो । १९.१ ओभरमा गण्डकीको सम्पूर्ण विकेट झरेको थियो । बागमतीको व्याटिङमा प्लेयर अफ द म्याच सोनी पाख्रिनले २१ रन बनाइन् ।

यसअघिको खेलमा एफिएफले मधेश प्रदेशलाई २७ रनले पराजित गरेको थियो । पहिला व्याटिङ गरेको एपीएफले ७ विकेटको क्षतिमा १ सय १ रन बनाएको थियो । मधेशका खेलाडीले पुरै २० ओभर खेले पनि ७ विकेट गुमाउँदै ७४ रनमात्रै बनाउन सके । एपीएफको जीतमा नेरी थापाले आफ्नो स्पेलमा ६ रन खर्चिएर ३ विकेट लिएकी थिइन् ।

एपिएफको व्याटिङमा ममता चौधरीले १७ तथा राजमति ऐरीले १६ रन जोडिन् । मधेशका लागि सरस्वती कुमारी र कविता गौतमले समान १३ रन बनाएका थिए ।