पोखरा । पोखरा स्वास्थ्य विज्ञान प्रतिष्ठानअन्तर्गत पश्चिमाञ्चल क्षेत्रीय अस्पतालको हालै निर्मित भवनमा गर्भवती तथा स्त्रीरोग जाँच गर्ने व्यवस्था मिलाइएको छ । सोही भवनमा बिहीबार गर्भ परीक्षण गराउन आएका महिलाहरुको लामै पंक्ति थियो ।
पालो कुरेकी पोखरा ११ की एक गर्भवती एक्कासि बेहोस भएर भुइँमा लडिन् । अगाडि पछाडि लाइनमै भएका, सुरक्षा गार्ड र बाहिरी क्षेत्रमा रहेका स्वास्थ्यकर्मीले उनलाई उठाए । केहीबेरमा होशमा आइन् ।
गभर्वती भएका कारण केही कमजोरी । त्यसैमाथि लाइनै लाइन पार गर्दै डाक्टर भेट्नुपर्ने झमेला । करिब दर्जन पटक लाइन बसेर डाक्टर भेट्ने प्रतीक्षामा रहेकी उनीजस्तै अन्यको पनि समान समस्या थियो ।
भिडियो एक्सरे (अल्ट्रासाउन्ड) गर्न पनि उस्तै थियो भिड । लमजुङकी बिना गुरुङ गर्भवती हुन् । उनले अघिल्लो दिनमा भिडियो एक्सरे गर्न पाइनन् । टोकन सकियो भनेपछि दोस्रो पटक बिहीबार टोकन लिन लाइनमा बसेको बताइन् ।
तल्लो पेट दुख्ने समस्या भएका कारण पोखरा १३ की सुमित्रा बराललाई पनि डाक्टरले भिडियो एक्सरे गर्न सिफारिस गरेका थिए तर उनी बिहीबार तेस्रो पटकमा सेवा पाउने आशामा थिइन् । २ पटकसम्म टोकन सकियो भनेर उनी फर्काइएकी थिइन् ।
म्याग्दीका १६ वर्षे प्रकाश गर्बुजाको मिर्गाैला समस्या भएकाले भर्ना गरिएको थियो, उनका अभिभावक भिडियो एक्सरे गर्न लिनुपर्ने टोकनको लाइनमा थिए । इमर्जेन्सीका बिरामीका लागि सोही दिन भिडियो एक्सरे गर्न सकिने भए पनि सामान्य बिरामीका लागि एकै दिनमा अस्पतालमा भिडियो एक्सरे गरी रिपोर्ट देखाउन पाए चिठ्ठा परेको महसुस गर्छन् ।
गर्भवतीलाई दर्जन पटक लाइन
अस्पतालको सेवा लिन सबैभन्दा पहिले बिरामी पुर्जा त जहाँसुकै पुगे पनि लिनैपर्छ । तर पश्चिमाञ्चल क्षेत्रीय अस्पतालमा भने १५ पटक जति फेर्दै फेर्दै लाइन बसेपछि गर्भवती जाँच पूरा गर्न सकिन्छ । तर एकै दिनमा जाँच गराउन भने मुस्किल छ ।
अस्पतालबाट सेवा लिन सबैभन्दा पहिले पालोको टोकन लिनुपर्छ । टोकन लिंदा स्वास्थ्य बिमा भएको र नभएको फरक–फरक लिनुपर्छ । बिमाको पुर्जा लिनै ढिलो हुन्छ । टोकन लिइसकेपछि पुर्जाको लागि पहिलो पटक लाइन बस्नुपर्ने अर्को झन्झट । डाक्टर कक्षमा प्रवेश गर्नुअघि तौललगायत जाँचका लागि दोस्रोपटक । प्रेसर जाँचका लागि तेस्रो पटक । डाक्टर कक्षमा प्रवेश गर्न चौंथो पटक । प्रेस्क्रिप्सनअनुसारको जाँच गराउन र बिल तिर्न पाँचौ पटक लाइन बस्नुपर्छ ।
गर्भवतीले समेत १५ पटक जति फरक फरक लाइनमा बसेर पालो कुर्नुपर्ने बाध्यता छ
भिडियो एक्सरे गर्नुपर्नेले टोकन लिन छैटौं पटक, टोकनपछि भिडियो एक्सरेको बिल तिर्न सातौं पटक, रसिद काटेपछि जाँचका लागि आठौं पटक लाइन बस्नुपर्ने बाध्यता छ । रगत पिसाब जाँच गर्नुपर्नेका लागि नवौं पटक लाइनमा खडा हुनुपर्छ । बल्लतल्ल जाँच प्रक्रिया पूरा हुनै लाग्दा रिपोर्ट लिन दशौं पटकको लाइनमा पनि लामो समयसम्म पालो कुरेरै बस्नुपर्छ । डाक्टरलाई रिपोर्ट देखाउन एघारौं पटक तथा औषधी किन्न (फार्मेसीमा) बाह्रौं पटक लाइन बस्नुपर्छ ।
स्वास्थ्य बिमा गरेकाले पहिले बुझाएको बिमा कार्ड फिर्ता लिन फेरि लाइन बस्नैपर्छ, यो सहित तेह्रौं पटक लाइन हुने बिरामीको गुनासो छ । त्यसो त यति पटक लाइन एकै दिनमा बसेर जाँच गराउन पाउने पनि कमै हुन्छन् । त्यसको भोलिपल्ट रिपोर्ट देखाउन फेरि टोकनसहित बिरामी पुर्जा लिनै पर्छ, जुन चौधौं पटकको लाइन हुन्छ भने डाक्टर कक्षमा प्रवेश गर्न पनि उस्तै पन्ध्रौं पटकको लाइन ।
दैनिक १५० जनाको मात्रै भिडियो एक्सरे
यो अस्पताल प्रदेशकै नागरिकले सेवा लिने संघ मातहतको अस्पताल हो । अस्पतालमा दैनिक १ सय ५० जनालाई भिडियो एक्सरे गर्ने टोकन दिइन्छ भने अन्यले पाउँदैनन् । जबकि अल्ट्रासाउन्ड गर्नुपर्ने गर्भवतीमात्रै टोकन संख्याको दोब्बर हुन्छन्, अन्य बिरामीको त कुरै छोडौं । अस्पतालमा ३ वटा अल्ट्रासाउन्ड मसिन छन् ।
कोभिड घटेपछि ३ मसिनले धान्नै नसक्ने चाप बढेको अस्पतालका निर्देशक प्राडा भरतबहादुर खत्रीले बताए । करिब २ महिनादेखि धान्नै नसकिने भिड भएको उनको भनाइ थियो । अस्पतालमा बिरामीको चाप बढेको, लामो लाइनमा पटक पटक बस्नुपरेको लगायत समस्या आफूलाई थाहा भएको उनको भनाइ थियो ।
दिनमा १ सय ५० जनरल, इमर्जेन्सी ३० देखि ५० गरी २ सय हाराहारीमा भिडियो एक्सरे हुने गरेको निर्देशक प्राडा खत्री बताउँछन् । डाक्टरबाहेक लेख्न जान्नेले युएसजी लेखिदिने अल्ट्रासाउन्ड गर्न नपर्नेले पनि गरिदिने गरेकाले भीड बढेको छ । बिमा सेवा मिसयुज भएकाले यसलाई नियन्त्रणको प्रयास गरिएको उनले बताए । उनले भने, ‘अब भिडियो एक्सरे सिफारिस गर्ने डाक्टरको एनएमसी उल्लेख गरेकै हुनुपर्छ, नत्र भिडियो एक्सरे नगर्नू भनेको छु ।’ हाल अस्पतालमा भएका ३ वटा अल्ट्रासाउन्ड मसिनमध्ये १ साधारण २ उच्च कोटीका छन् ।
समस्या समाधानमा पहल गरिरहेकै छु : प्राडा खत्री
बिमाले व्यवस्थापन गर्न नसकेका कारण पनि अस्पतालमा लामो लाइन हुने गरेको निर्देशक प्राडा खत्रीको स्वीकारोक्ति छ । उनले भने, ‘बिमा आफैं रोगी भयो । बिमा बोर्डले गण्डकी मेडिकल कलेज र मणिपाल अस्पतालबाट दिने गरेको बिमा सेवा बन्द गर्दिन्छु भनेको छ ।’ स्वास्थ्य बिमाबाहेकको जाँचमा पनि झमेला भने उस्तै नै हो । लामो र पटक–पटक लाइन बस्नुपर्ने समस्या समाधानका लागि मिडाजसँग सम्झौता गर्ने तयारी रहेको उनले बताए । पेपरबेस्ड भएकोमा वेभबेस्ड बनाउने तयारी गरिएको उनको भनाइ थियो । मिडाजसँग सम्झौता भएपछि पटक पटक लाइन बस्नुपर्ने बाध्यता छोट्याउन सकिने उनको विश्वास छ ।
आफूले तत्कालै गर्न चाहेर पनि गर्न नसकेको, प्रक्रियागत झमेला बाधक भएको निर्देशक प्राडा खत्रीको गुनासो छ । उनले भने, ‘स्वास्थ्य मन्त्रालयले हामीसँग मिल्ने सफ्टवेयर राख भन्यो, हामीले गाइडलाइन माग गरेका थियौं, भोलि–भोलि भन्दै गर्दा ढिला भयो । सम्झौता कसरी गर्ने भन्ने क्लियर गरिदिए तत्काल टुंगाउने थियौं ।’
अस्पतालका निर्देशक प्राडा खत्रीले समस्या समाधानका लागि तत्काल सम्झौता गर्न विकल्प पनि सोचेको सुनाए । उनले भने, ‘पछि स्वास्थ्य मन्त्रालयले दिएका निर्देशन सफ्टवेयरमा राख्ने गरी शर्त राखेर भए पनि सम्झौता गर्ने कि भन्नेतर्फ सोचिरहेको छु ।’ उनले माथिल्लो निकायबाट सहयोग नपाएको गुनासो गरे । तत्काल गर्न खोजे पनि माथिल्लो निकायका कारण रोकिने गरेको उनले सुनाए । लाइन बस्नुपर्ने बाध्यता टोकन सिस्टम र फुल कम्प्युटराइज्ड गर्न सके समाधान हुने सोचेको तर तत्काल लाइन समस्या समाधान हुन नसकेको उनको भनाइ थियो । गर्भवती तथा स्त्रीरोग जाँचसम्बन्धी सेवा दिन १÷२ वटा अल्ट्रासाउन्ड ‘गाइने’ विल्डिङमै राखिदिने योजना पनि उनले सुनाए ।
अस्पताललाई हाल १ करोड बजेट प्राप्त भएकोमा २ भिडियो एक्सरे मसिन किन्ने उनको योजना छ । उनका अनुसार यही आर्थिक वर्षभित्र एउटा हाइ इन्ड र १ मिड इन्ड भिडियो एक्सरे मसिन खरिद गरिसक्ने योजना हो । हाइ इन्ड मेसिन किन्न ५० लाख माथि र मिडियम इन्ड ३० देखि ५० लाखसम्म पर्ने उनको भनाइ छ ।
Related News
सम्बन्धित समाचार
सहकारीका विकृति राजनीतिकर्मीका लागि चुनौती : मुख्यमन्त्री अधिकारी
पर्वत र बागलुङका सिडिओ फेरिए
धानको लोपोन्मुख प्रजाति संरक्षण गरिँदै
गण्डकीमा थुप्रिए रुग्ण र समस्याग्रस्त योजना
सराङकोटमा सहिद स्मृति भवन निर्माण
hero news full width
मुख्य समाचार
जनप्रिय क्याम्पस प्रमुखमा रमेशबहादुर खड्का
पोखराका स्पामा बालिकालाई लगाइन्छ यौनजन्य कार्यमा, ६ जनाको उद्धार
जेठ २, २०८१बलात्कार मुद्दामा सन्दीप लामिछानेले पाए सफाइ
जेठ २, २०८१पोखरामा फोहोरबाट रोजगारी सिर्जनाका लागि कोरियाको ९८ लाख अमेरिकी डलर सहयोग
जेठ २, २०८१व्यास नगरपालिकामा मेयर चुनावको पुन मतगणना गर्न आदेश
जेठ २, २०८१पोखरामा बुद्ध जयन्तीको सप्ताहव्यापी कार्यक्रम
जेठ २, २०८१