पोखरा । काइन्डनेस क्लब मदरल्यान्ड बोर्डिङको दोस्रो वर्ष प्रवेश अवसरमा बालसमाजसेवी प्रेन्सा रेग्मीलाई सम्मान गरिएको छ । उनलाई १० हजारसहित सम्मान गरिएको हो । कोभिड–१९ महामारीमा निशुल्क मास्क, खाद्यान्न, स्वास्थ्य सामग्री, कापी किताब वितरणलगायत विविध समाजसेवाको काम गर्दै आएकोले प्रेन्सालाई सम्मान गरिएको हो ।
सो अवसरमा क्लबले प्रदान गर्ने काइन्डनेस टिचर अवार्डबाट नूरमाया केसी सम्मानित भइन् । उनलाई ५ हजारसहित सम्मान गरियो । उनीहरुलाई विद्यालय निर्देशक त्रिभुवन बराल, प्रिन्सिपल नारायण बराल, क्लब अध्यक्ष कृतिका नागिला लगायतले सम्मान गरेका हुन् । सम्मानित प्रेन्साले थोपा–थोपा मिलेर सागर बनेजस्तै आफूले गरेको अभियानमा अरु पनि थपिंदै जाँदा नेपाललाई समृद्धि बनाउन सकिने बताइन् । कार्यक्रम सञ्चालन क्लब सदस्य निश्चल बास्तोलाले गरेका थिए । कार्यक्रममा विद्यालय निर्देशक त्रिभुवन बराल र प्रिन्सिपल नारायण बरालले क्लबले गरेको कार्यको प्रशंसा गरे ।
काइन्डनेस क्लब मदरल्यान्ड स्थापना भएको १ वर्षमा कल्याणी बालआश्रमका १२ जना बालबालिकालाई खाद्यान्न, लत्ता कपडा, जुत्तालगायत वितरण गरिएको थियो । यस्तै लकडाउनका बेला समस्यामा परेका १५ दृष्टिविहीन र १५ जनाका परिवारलाई खाद्यान्न वितरण, विश्व करूणा दिवसमा अवसरमा मानवसेवा आश्रमका ६३ जना ज्येष्ठ नागरिक र ९ जना बालबालिकालाई लत्ता कपडा वितरण गरिएको शिक्षिका केशु बरालले जानकारी दिइन् ।