पोखरा । महिला सीप विकास संस्थामा सञ्चालित गुडिया बनाउने तथा सिलाइ तालिम समापन भएको छ । १ महिनासम्म चलेको तालिमको समापन कार्यक्रममा गण्डकी प्रदेशका सांसद बिन्दुकुमार थापाले प्रशिक्षार्थीलाई प्रमाणपत्र वितरण गरेका थिए ।

सांसद थापाले तालिममा सिकेका कुरालाई व्यवहारमा उतार्नुपर्नेमा जोड दिए । सीपमूलक तालिमका साथै बोल्ने कलाको समेत विकास गर्न र राज्यले महिलालाई सबै क्षेत्रमा आरक्षण दिएको हुँदा अवसरको सदुपयोग गर्न उनले सुझाए ।

संस्थाका कार्यकारी निर्देशक रामकली खड्काको अध्यक्षतामा भएको समापन समारोहमा ग्रो नेपालका अध्यक्ष महेन्द्र नारायण महत्तोले तालिमको प्रभावकारी उपयोगमा जोड दिए ।

तलिममा १५ जनाले गुडिया बनाउने र १८ जनाले सिलाइ आधारभूत सीप सिकेका थिए । महिला सीप विकास संस्थाले सञ्चालन गरेको महिला सशक्तीकरण कार्यक्रमलाई ग्रो नेपालले सहयोग गर्दै आएको छ ।