पोखरा । एनसेल आजियाटा लिमिटेडले विद्युत् महसुलवापतको करोडौं रकम तिर्न नसक्ने भन्दै जिल्ला अदालत कास्कीमा फिरादपत्र दायर गरेको छ । एनसेलले विद्युत् प्राधिकरण लेखनाथ वितरण केन्द्रलाई बुझाउनुपर्ने करिब १४ करोड रुपैयाँ तिर्न नसकिने भन्दै फिराद दायर गरेको हो ।
केन्द्रले कात्तिक २१ गते नेपाल विद्युत् प्राधिकरणका कार्यकारी निर्देशकको निर्णय भन्दै एनसेललाई १३ करोड ८० लाख १७ हजार रुपैयाँ ३५ दिनभित्र बुझाउन चेतावनी सहितको पत्र पठाएको थियो । समयमा रकम नबुझाए विद्युत् सेवा बन्द हुने चेतावनी दिएपछि एनसेल कम्पनीका प्रतिनिधिले प्राधिकरणको निर्णय खारेज गरिदिन मागसहित जिल्ला अदालत पुगेका हुन् । एनसेलतर्फबाट कर्पोरेट सेवा प्रमुख रमेश घिमिरे र कम्पनी सचिव निशिका शर्मा तथा कम्पनीका वारेस नीरज श्रेष्ठले छुट बिल भुक्तानीको निर्णय र प्राधिकरणको पत्र बदर गरिदिन अदालतसमक्ष अनुरोध गरेका हुन् ।
तालचोकमा रहेको विद्युत् प्राधिकरण, वितरण तथा ग्राहक सेवा निर्देशनालय, कार्यालय प्रमुख नवीनकुमार लाभ र नेपालत विद्युत् प्राधिकरण केन्द्रीय कार्यालयलाई विपक्षी बनाई फिराद दायर भएको जिल्ला अदालत कास्कीका स्रेस्तेदार रामप्रसाद पौडेलले जानकारी दिए । प्राधिकरणले दाबी गरेको रकम विद्युत् वितरण विनियमावलीविपरीत रहेको एनसेलले जनाएको छ । आफूहरुले २०६९ सालमै रकम तिरेर फरफारक भैसकेपछि प्राधिकरणले अहिले छुटदाबी गरेर रकम माग गर्नु कानूनविपरीत भएकोले उक्त निर्णय खारेज गर्न एनसेलको आग्रह छ ।
वितरण केन्द्र प्रमुख लाभले २०६९ भदौ २३ देखि २०७७ असार ११ सम्मको रकम भुक्तानीका लागि पत्र पठाएका थिए । ‘कार्यकारी निर्देशकको निर्णय अनुसार १३ करोड ८० लाख १७ हजार ७ सय ४५ रुपैयाँ छुट बिल गरिएको हो । सो बारेको निर्णय र त्यहाँबाट माग भएका विषयको जवाफ दिन सपोर्टिङ हुने डकुमेन्टहरु यसैसाथ संलग्न गरी पठाइएको छ । प्राविधिक विषय तथा अन्य बिलिङ्गसँग सम्बन्धित कुरा बुझ्नुपरेमा यस वितरण केन्द्रमा सम्पर्क गर्नुहुन अनुरोध गरिन्छ,’ लाभले कात्तिक १० गते पठाएको पत्रमा उल्लेख छ ।
यता, एनसेलले भने प्राधिकरणले गलत बाटोबाट पैसा असुल्न खोजेको आरोप लगाएको छ । आफूखुसी मिटरको सिल काट्ने र रिप्रोग्रामिङका लागि पठाउनु प्राधिकरणको गल्ती भएको एनसेलको गुनासो छ । ‘२०७२ पुस ५ गते भने एनसेलकै प्रतिनिधिको रोहवरमा मेन मिटरको रिडिङ टिपेर काठमाडांै पठाएको थियो,’ फिरादपत्रमा भनिएको छ, ‘हाल त्यस्तो टिओडी मिटरमा के त्रुटी भई मिटरको डाटा डाउनलोड गरिएको हो ? ग्राहकको उपस्थिति र सहभागिताबिना एकतर्फी रुपमा डाउनलोड गरेको भनिएको डाटालाई ग्राहकले आधिकारिक र यथार्थपरक मान्नै पर्ने आधार र कारण के हुन ?’
प्राधिकरणबाट टिओडी मिटर जडान गरिएका ग्राहकको महसुल लिनका लागि २ सय केभिए वा सो भन्दा बढी लोड स्वीकृत भएका ग्राहकको प्रत्येक ३ महिनामा सीटी÷पीटी र मिटर निरीक्षण गरि अनिवार्य रुपमा प्रतिवेदन पेश गर्नुपर्ने नियम छ । प्रतिवेदन पेस नभएपछि हुन सक्ने हानी नोक्सानीको दायित्व सम्बन्धित कार्यालय प्रमुख, मिटर रिडिङ तथा निरीक्षण गर्ने इन्जिनियर र लेखा प्रमुखको हुने उल्लेख छ । मेन मिटरमा कुनै समस्या आए मात्रै ३ महिनाभित्र चेक मिटरबाट रिडिङ गरि बिलिङ गर्नुपर्ने कानूनी व्यवस्था छ । तोकिएको समयसीमा नाघेकोले २०६९ सालदेखि बिल छुट भएको भनी दाबी गर्न नमिल्ने एनसेलको तर्क छ । ‘यो दाबी कुनै न्यायसंगत छैन । हचुवा भरमा गरिएको स्वेच्छाचारी निर्णय गैह्रकानूनी रहेकोले खारेज गरिपाउँ,’ पत्रमा उल्लेख छ । २०७७ कात्तिक ६ को निर्णय र त्यसपछिका सबै पत्रहरु खारेज गर्नुपर्ने एनसेलको माग छ ।
विद्युत् वितरण केन्द्र तालचोक एनसेलले तोकिएको रकम तिर्नैपर्ने अडानमा छ । ९३ लाख ७३ हजार २ सय ३४ युनिट विद्युत्को महसुल बुझाउन बाँकी रहेको केन्द्रले जनाएको छ । ‘डेडिकेटेड लाइन भएकोले बढी महसुल लागेको हो । केन्द्रले नै मूल्याङ्कन गरेर छुट बिल स्वीकृत भएको हो । त्यसकै आधारमा केन्द्रले सूचना निकाल्यो,’ कार्यालयले भनेको छ । एनसेलले भने मुद्दा किनारा नलाग्दासम्म विद्युत् कटौती गर्न नहुने भन्दै त्यसलाई रोकिदिन अदालत गुहारेको हो । ‘दूरसञ्चार राष्ट्रिय प्राथमिकता प्राप्त सेवा भएकोले २४ घण्टा र सातै दिन निरन्तररुपमा सञ्चालन गर्नुपर्छ । तर वितरण केन्द्रले भने ३५ दिनभित्र रकम भुक्तानी नगरे विद्युत् बन्द गर्न सक्ने अवस्था भएको हुँदा मुद्दाको अन्तिम किनारा नभएसम्म विद्युत् आपूर्ति बन्द नगर्न अन्तरकालीन आदेश जारी गरियोस् । गत असार ११ गतेसम्मको छुट बिल भुक्तानीका लागि वितरण केन्द्रले गरेको मंसिर ६ गतेको निर्णय बदर गरिपाउँ,’ फिरादमा भनिएको छ ।
Related News
सम्बन्धित समाचार
भ्रष्टाचार नियन्त्रणमा सार्थक प्रयास भएन : धनराज गुरुङ
गण्डकीको संसद बैठक २३ गते ३ बजे बस्ने, मुख्यमन्त्री अधिकारी विश्वासको मत लिँदै
मुख्यमन्त्री अधिकारीले २३ गते विश्वासको मत लिने, राप्रपा विपक्षमै
राप्रपाले साथ नदिने भएपछि अधिकारी सरकार संकटमा, अब के होला ?
लाटोकोसेरो संरक्षक राजु आचार्यलाई बेलायतमा अवार्ड
hero news full width
मुख्य समाचार
पाेखरामा कालो धुँवा फाल्ने गाडीका चालक कारवाहीमा
मजदुरलाई छैन मजदुर दिवस रौनक
वैशाख २०, २०८१गण्डकीमा संविधान भर्सेज सर्वोच्च
वैशाख २०, २०८१पोखराको अमरसिंहको बिजुली पसलमा आगलागी, १ करोडको क्षति
वैशाख २०, २०८१गण्डकी प्रदेशमा सत्ता राजनीति : प्रदेश सभा सदस्य ६०, बहुमत ३० ले पुग्ने !
वैशाख १९, २०८१नारायणगढ–बुटवल सडक ३३ किमी कालोपत्रे
वैशाख १९, २०८१