लेखनाथ, २२ असोज । नेपाल उद्योग वाणिज्य महासंघका उपाध्यक्ष किसोर प्रधानले महासंघ र जिल्ला तथा नगर उद्योग वाणिज्य संघ बीचको सम्वन्ध जीवन्त हुनु पर्नेमा जोड दिएका छन् ।

नेपाल उद्योग वाणिज्य महासंघको मंसिर ११ र १२ मा हुन लागेको ५४ औ बार्षिक साधारण सभा तथा चुनावका शिलशिलामा विहिबार लेखनाथ उद्योग वाणिज्य संघले राखेको स्वागत तथा सम्मान कार्यक्रममा बोल्दै प्रधानले जिल्ला तथा नगर उद्योग वाणिज्य संघको माया र प्रेमले यस पटक महासंघले मेरो नेतृत्व मागेकाले वरिष्ठ उपाध्यक्ष पदमा उमेदवारी दिने बताएका छन् ।

आफनो व्यवसायलाई एकातिर थाति राखि साना तथा मझौला उद्योग व्यवसायीहरुका समस्याप्रति सजक हुदै आफनो जिवनको २८ वर्ष महासंघमा लागेको अनुभवलाई दिशानिर्देश गर्दै मेलमिलापको आधारमा अगाडि वढ्ने धारणा समेत राखेका थिए ।

कार्यक्रममा महासंघका केन्द्रिय सदस्य दिनेश श्रेष्ठले सवै व्यवसायीलाई केन्द्रिय तहसम्म पहुँच पुर्‍याउने उद्देश्यले नौलो यात्राको गन्तव्य नाम राखेर आफुहरु चुनाबी प्रचार प्रसारको अभियानमा घरदैलोमा लागेको बताएका थिए ।

सोही अवसरमा लेखनाथ उद्योग वाणिज्य संघका अध्यक्ष बलराम ढकालले महसंघमा चुनावी एजेण्डा भन्दा पनि पैसा खर्च गरेर नेतृत्व लिने होडको अन्त्य गरि तडक भडक विनाको निर्वाचनले मात्र एकता सन्देश र जिल्ला तथा नगर उद्योग वाणिज्य संघलाई अपमान गर्ने प्रवृत्तिको अन्त्य हुने सुझाव राखेका थिए ।

संघका अध्यक्ष बलराम ढकालको अध्यक्षतामा भएको कार्यक्रममा महासचिव गोपिचन्द्र वास्तोलाले संचालन र वरिष्ठ उपाध्यक्ष छत्र आत्रेयले धन्यवाद ज्ञापन गरेका थिए ।

यसै बीच महासंघको ५४ औं बार्षिक साधारण सभा तथा अधिवेसनका लागि लेखनाथ उद्योग वाणिज्य संघले पूर्व अध्यक्ष बाबुराम गिरीलाई गण्डकी प्रदेश केन्द्रिय सदस्य पदमा उमेदवारी दिने घोषणा गरेको छ ।