पोखरा, बैशाख ३० । अष्ट्रियन नागरिक थोमेस जोमेजले लकडाउनका कारण समस्यामा परेका विपन्न परिवारलाई राहत वितरण गरेका छन् ।

कोरोना भाइरस नियन्त्रणका लागि जारी गरिएको लकडाउनका कारण पर्न गएको समस्यालाई मध्येनजर गर्दै छा–या अष्ट्रियाको सहयोगमा पोखरा दृष्टि मार्गका विपन्न परिवारलाई रहात वितरण गरेका हुन् ।

पोखरा महानगरपालिकाको सहकार्यमा उनले आफ्नो टिम सहित आज (मंगलबार) ७५ परिवारलाई राहत वितरण गरेका छन् ।

उनीहरुले २५ के.जी चामल, १ के.जी रातो दाल, १ पोका सोयाबिन, १ लिटर तेल, १ पोका नुन र २ वटा साबुन गरि प्रति परिवारलाई वितरण गरेको थोमेस जोमेजले बताए। छा–या अष्ट्रियाले नेपालका लागि गरेको सहयोगबाट नै आफुहरुले राहतको व्यवस्थापन गरेको उनले जानकारी दिए ।

लकडाउनका कारण आफ्नो टोल छिमेकीका परिवारमा परेको समस्यालाई मध्येनजर गर्दै उनीहरुले यो अभियान सुरु गरेको पोखरा महानगरपालिका–६ का वडा अध्यक्ष जगतबहादुर पहारीले जानकारी दिए ।

थोमेस जोमेज अष्ट्रियाका नागरिक हुन् । उनी नेपालमा आाएको दुई बर्ष भयो, बर्षमा उनी ५ महिनामात्र नेपालमा बस्छन् ।

हाल कोरोना भाइरस नियन्त्रणका लागि गरिएको लकडाउनले विपन्न परिवारमाथि परेको समस्यालाई समाधान गर्न उनीहरुले अबदेखि हरेक हप्ताको मंगलबार राहत वितरण गर्ने योजना बनाएका छन् ।

थोमेसलाई उक्त अभियानमा छा–या अष्ट्रियासँगै टम, माइक, डा.रविराज तिमिल्सिना, ध्रुव बस्नेत, संगीता बस्नेत लगायतले सहयोग गरेका छन् ।