पोखरा, ११ वैशाख । कोरोना संक्रमणपछि उपचाररत बागलुङ कुँडुलेकी १९ वर्षीया अंशु सापकोटाको पाँचौ रिपोर्ट नेगेटिभ आएको छ । बुधबार लिइएको स्वाब परीक्षण गर्दा नेगेटिभ आएको हो । उनको लगातार चौंथो पटकसम्म पोजिटिभ देखिएको थियो ।

गएको चैत १४ गतेदेखि उनी धवलागिरि अञ्चल अस्पतालमा उपचाररत थिइन् । उनीसँगै उपचाररत ६५ वर्षीया बृद्धाको यसअघि नै कोरोना नेगेटिभ आएपछि डिस्चार्ज भैसकेकी छिन् । अंशुको शुक्रबार पुनः अर्को स्वाब लिने र नेगेटिभ आए डिस्चार्ज गरिने अस्पतालले जनाएको छ ।लगातार दुईवटा रिपोर्ट नेगेटिभ आएपछि मात्रै कोरोना नभएको पुष्टि हुन्छ । उनीहरु दुवैजना गएको चैत ४ गते कतार एयरवेजमार्फत बेल्जियमबाट नेपाल आएका थिए ।