हेमजा, २ असार। सामुदायिक सेवा केन्द्र एवं सामुदायिक प्रहरी सेवा हेमजाको आयोजनामा शनिवार मिलनचोकदेखि साझा हुँदै लामाचौतारासम्म सरसफाइ गरिएको छ ।

करिब १ किमी राजमार्ग क्षेत्र सरसफाइमा हेमजाका नागरिक, पत्रकार, प्रहरी, विभिन्न संघसंस्थाका प्रतिनिधि, केन्द्रका सदस्य लगायतको बाक्लो उपस्थिति थियो। संकलित फोहर पोखरा लेखनाथ महानगरपालिकाको फोहर संकलन गर्ने गाडीमा व्यवस्थापन गरिएको थियो।वडाध्यक्ष शोभाकर तिम्सिनाले फोहरमैला व्यवस्थापनका लागि फोहरको वर्गीकरण गरिनुपर्नेमा जोड दिए । उनले आमनागरिक सचेत भएमात्रै समाज सु-संस्कृति युक्त बन्ने दावी गरे।

केन्द्र अध्यक्ष विष्णु बास्तोलाले केन्द्रका गतिविधिमा सबै हेमजावासीले साथ दिनुपर्ने औल्याइन्। उनले कार्यक्रमलाई साप्ताहिक रुपमा निरन्तरता दिइने पनि जनाइन् ।

आगामी साताको श्रृङ्खला लामाचौतारादेखि स्थानीय तिब्वतीयन क्याम्पसम्म हुने जनाइएको छ।

केन्द्रकी अध्यक्ष बास्तोलाको अध्यक्षतामा सम्पन्न उक्त कार्यक्रम केन्द्रका सचिव दानबहादुर भुजेलले सञ्चालन गरेका थिए।