पोखरा, २१ फागुन । पोखरा लेखनाथ वडा २३, चापाकोटमा अवस्थित सिद्धबराह माविमा भूतपूर्व विद्यार्थी मञ्च पुनर्गठनसँगै जिल्ला शिक्षा कार्यालय कास्कीको अनुदान सहयोगमा चारकोठे भवनको शनिबार शिलान्यास गरिएको छ। भवनको पोखरा लेखनाथ महानगर पालिकाका मेयर मानबहादुर जिसीले शिलान्यास गरेका हुन्।

उक्त अवसरमा पुनर्गठित भूतपूर्व विद्यार्थी मञ्चको अध्यक्षमा सूर्यप्रसाद भण्डारी सर्वसम्मत चयन भएका छन् ।

१७ सदस्यीय मञ्चको उपाध्यक्षमा लीला अधिकारी त्रिपाठी निर्वाचित भइन् । सचिवमा जीवनकुमार सुनार, कोषाध्यक्षमा सन्दीप पराजुली, सहसचिवमा हरिप्रसाद पौडेल र सहकोषाध्यक्षमा रोशनी शर्मा चयन भए ।

सदस्यमा लेखबहादुर क्षेत्री, कमलप्रसाद पराजुली, तारानाथ पराजुली, कृष्णबहादुर नेपाली, रामजी पौडेल, आयुष परियार, निर्मल पराजुली, गुरुदत्त पराजुली र दीपकप्रसाद पराजुली छन्।

सल्लाहकार संयोजकमा प्रेमप्रसाद पराजुली र सूर्य पराजुली ठूलादाइलाई मञ्चको अभियन्ताका रूपमा मनोनीत गर्ने निर्णय समेत गरेको छ।

फेसबुक म्यासेन्जर युकेबाट परिकल्पना गरिएको उक्त मञ्चले विद्यालयमा २० लाखको लागतमा चमेना गृह निर्माण गर्ने काम पनि शुरु गरिसकेको छ। हाल १० लाख रूपैयाँ सहयोग उठिसकेको र बाँकी रकम भूतपूर्व विद्यार्थी तथा दाताबाटै उठाएर काम सम्पन्न गर्ने लक्ष्य लिइएको मञ्चका कोषाध्यक्ष सन्दीप पराजुलीले बताए ।