पोखरा, १२ फागुन । पुरानो ढुंगाको छानो । भित्तामा सफाचट सेतो रंग । आउटडोरमा ढुंगै टाँसिएको छ । भुइँमा टायल बिछ्याइएको र सुत्ने कोठाभित्रै आधुनिक बाथरुम । बाहिर सामान्य जस्तो लाग्ने यो घरको भित्री सजावट भिआईपी छ ।
नयाँ संरचना अनुसार प्रदेश सरकार गठन भएपछि महानगरले बनाएको फेवा किनारको अतिथिगृहमा यतिबेला मुख्यमन्त्री बस्न थालेका छन् ।
२०३५ सालमा बनेको ड्यामसाईडको यो घरमा महानगरले पाहुना राख्दै आएको थियो । तर मर्मत अभावले चुहिने भएपछि यहाँ लामो समयदेखि पाहुना पनि राख्न छोडिएको थियो । महानगरको चुनावपछि मर्मत गरेर मेयरको आवास बनाउने तयारी पनि थियो । तर मर्मतमा अल्छि गरेर महानगरको कार्यपालिका बैठकले नै भाडाको घर खोजेर मेयरलाई आवास सुविधा दियो । हिमागृहमा पर्यटन व्यवसायीको विरोधपछि धेरै ठाउँ डुलाउँदै प्रदेश संरचना व्यवस्थापन समितिले महानगरको थोत्रो अतिथिगृहलाई मुख्यमन्त्रीको आवासको रुपमा प्रयोग गर्ने सिफारिस गर्यो र त्यसैलाई मर्मत गरेपछि अहिले मुख्यमन्त्री पृथ्वीसुब्बा गुरुङले बसाइँ थालेका हुन् ।
पुराना सबैजसो भित्री संरचना हटाएर नयाँ सजावट टाँसिएको यो घरमा डेकोरेसनका लागि मात्रै झण्डै ४० लाख रुपैयाँ खर्च भएको छ । ‘अहिलेसम्म ४० लाख हाराहारीमा खर्च भैसक्यो । अझै केही काम बाँकी नै छ’, निर्माणमा खटिएका महानगरका सव-इञ्जिनियर नेत्र तिमिल्सिनाले भने, ‘आवश्यक परेको सामान ल्याएर काम गरिरहेका छौं । अन्तिममा खर्च विवरण एकमुष्ट निकाल्छौं ।’ यसका लागि नेपाल सरकारले २५ लाख रुपैयाँ निकासा दिएको छ भने बाँकी रकम महानगरपालिकाले नै लगानी गर्नुपर्छ ।
मुख्यमन्त्रीको निवासको गेटैमा सचिवालय र मिटिङ हल पनि निर्माण हुँदैछ । यसको काम अझै बाँकी छ । यसबाहेक किचन पनि नयाँ बनाइएको छ । करिब ३० लाख नयाँ संरचनामा मात्रै खर्च भएको तिमिल्सिनाले जानकारी दिए । नयाँ आवासमा मुख्यमन्त्री गुरुङ पूजाआजा गरी शुक्रबारदेखि बसाइँ सरेका छन् । तर यो आवास पनि अस्थायी हो । मुख्यमन्त्रीको कार्यालय नजिकै नयाँ भवन बन्दैछ । जसलाई मुख्यमन्त्रीको आवासको रुपमा सिफारिस गरिएको छ । बैशाखसम्ममा भवन तयार भैसक्ने बताइएको छ । यो तयार भएपछि फेवा किनारको भवनमा पोखरा लेखनाथ महानगरका मेयर मानबहादुर जिसी सर्नेछन् । प्रदेशसभाका सभामुख र उपसभामुखका लागि एयरपोर्ट अगाडिको पर्यटन कार्यालयमा निवास तयार गरिएको छ । सभामुख नेत्रनाथ अधिकारी निवासमा सरिसकेका छन् भने उपसभामुख सिर्जना शर्माको पोखरामै घर भएकाले केही पछि सर्ने बुझिएको छ । यसैबीच, मन्त्रीहरुका लागि पनि क्वाटरको व्यवस्था लगभग भैसकेको छ । नियुक्त भएका ३ मन्त्री अहिले सरकारी निवासमै बस्छन् । उद्योग, पर्यटन, वन तथा वातावरण मन्त्री रानीपौवाको क्षेत्रीय स्वास्थ्य तालिम केन्द्रमा बस्न थालेका छन् भने भूमि व्यवस्था, कृषि तथा सहकारीमन्त्री लेखबहारदुर थापा बिरौटास्थित जिल्ला कृषि विकास कार्यालयको आवास र आन्तरिक मामिला तथा कानुनमन्त्री हरिबहादुर चुमान सशस्त्र प्रहरी बलको मुक्तिनाथ बाहिनीको गेष्ट हाउस बसिरहेका छन् । मन्त्रीका आवासका लागि ड्यामसाईडस्थित मुख्यमन्त्रीको निवास आडैमा रहेको पश्चिमाञ्चल क्षेत्रीय सिँचाइ निर्देशनालयको आवासलाई मर्मत गर्ने काम भैरहेको छ । यहाँ ४ मन्त्रीको आवास बनाइनेछ । आन्तरिक मामिला तथा कानुन, आर्थिक मामिला तथा योजनामन्त्री, भौतिक पूर्वाधार विकासमन्त्री र भूमि व्यवस्था, कृषि तथा सहकारीमन्त्रीलाई सिँचाइको आवासमा बस्ने व्यवस्था मिलाउन लागिएको प्रदेश ४ का प्रमुख सचिव लक्ष्मणप्रसाद अर्यालले जानकारी दिए । सामाजिक विकास मन्त्री चाहीँ हाल उद्योग मन्त्री बस्नेत बस्दै आएका क्षेत्रीय स्वास्थ्य तालिम केन्द्रमै बस्नेछन् ।
सरकारले प्रदेश संरचना मर्मतका लागि शहरी डिभिजन कार्यालय पोखरा मार्फत तत्काल साढे ७ करोड विनियोजन गरेको थियो । सोही बजेटबाट काम भइरहेको कार्यालय प्रमुख किशोरलाल महाजुले जानकारी दिए । प्रदेशमा काम गर्न खटिएका कर्मचारी र मन्त्रीहरुको पनि दीर्घकालीन निवास र अन्य सुविधाको टुंगो लगाउन प्रदेशको मन्त्रिपरिषद् बैठकबाट एक समिति गठन गरिएको छ । समितिको सिफारिसका आधारमा संरचना निर्माणको काम थालिने प्रदेश सरकारका प्रवक्ता रामशरण बस्नेतले जानकारी दिए ।
Related News
सम्बन्धित समाचार
पोखरामा धुवाँको कालो मुस्लो फ्याक्ने ११ गाडी नियन्त्रण
स्वास्थ्य संस्थाहरूमा किशोरकिशोरीमैत्री सेवा र पहुँच आवश्यक छ : प्रमुख आचार्य
पाेखरामा कालो धुँवा फाल्ने गाडीका चालक कारवाहीमा
श्रमको सम्मान नगर्नेहरू असभ्य: मुख्यमन्त्री
मेजर वीरसिंहको १२२ औं जन्मजयन्ती
hero news full width
मुख्य समाचार
भ्रष्टाचार नियन्त्रणमा सार्थक प्रयास भएन : धनराज गुरुङ
गण्डकीको संसद बैठक २३ गते ३ बजे बस्ने, मुख्यमन्त्री अधिकारी विश्वासको मत लिँदै
वैशाख २१, २०८१मुख्यमन्त्री अधिकारीले २३ गते विश्वासको मत लिने, राप्रपा विपक्षमै
वैशाख २१, २०८१राप्रपाले साथ नदिने भएपछि अधिकारी सरकार संकटमा, अब के होला ?
वैशाख २०, २०८१लाटोकोसेरो संरक्षक राजु आचार्यलाई बेलायतमा अवार्ड
वैशाख २०, २०८१मजदुरलाई छैन मजदुर दिवस रौनक
वैशाख २०, २०८१