पोखरा । रत्ना गुरुङद्वारा लिखित तथा निर्देशित गुरुङ चलचित्र ‘सैंर्वे ट’ (मनको फूल) प्रिमियर शो हुने भएको छ । आगामी मंसिर ९ गते पोखराको सिने प्लेक्समा प्रिमियर शो हुने भएको हो ।

माओत्से गुरुङ फिल्मस्को सहकार्यमा उचाइ स्टुडियो प्रालिको ब्यानरमा निर्मित चलचित्रमा नायक विश्वात्मा गुरुङ र नायिका कृष्टि गुरुङको मुख्य अभिनय छ । यस्तै गजेन्द्र गुरुङ, सूर्य सुनुवार, डिबी गुरुङ, लालशोभा गुरुङ, प्रकृति गुरुङ, राममाया गुरुङ लगायत कलाकारको भूमिका छ ।

निर्मातासमेत रहेकी निर्देशक गुरुङका अनुसार गुरुङ समुदायको संस्कार, संस्कृति र परिवेशमा आधारित चलचित्रमा प्रेमको विषयलाई केन्द्रमा राखेर फिल्म निर्माण गरिएको छ । पारिवारिक एवं प्रेमकथामा आधारित उक्त चलचित्रको छायांकन स्याङ्जाको कोल्मा, पोखरीछाप तथा पोखराका विभिन्न स्थानमा गरिएको छ ।

निर्देशक गुरुङले फिल्ममा प्राविधिक पक्षमा नयाँपनको अभ्यास गरिएको दाबी गरिन् । सञ्चारकर्मीसमेत रहेकी गुरुङले यसअघि लघु चलचित्र म्हैता (पाइला) को पनि निर्देशन गरेकी थिइन् ।

सैंर्वे टको सम्पादन दीपेश गुरुङले गरेका छन् भने छायांकन सन्देश गुरुङको हो।