पोखरा । पोखरा ५ स्थित सूर्यचन्द्र विकास समाजले भदौ १२ देखि १४ गतेसम्म खुला तीजगीत तथा महिला खेलकुद प्रतियोगिता गर्ने भएको छ । कोभिडका कारण २ वर्ष स्थगित कार्यक्रम यसवर्ष सञ्चालन गर्न लागिएको हो ।

तीज गित प्रतियोगितासँगै महिलाहरुको छेलो र दौड प्रतियोगितासमेत राखिने आयोजकले जनाएको छ । तीज गीत प्रतियोगितामा प्रथम हुने टिमले २० हजार, दोस्रोले १५ हजार, तेस्रोले १० हजार र सान्त्वना टिमले ५ हजार नगद प्राप्त गर्नेछन् ।

उत्कृष्ट भेषभूषा, उत्कृष्ट नृत्य र दर्शक उत्कृष्ट नृत्यमा पनि पुरस्कार राखिएको आयोजकले जनाएको छ । मालेपाटन खेल मैदानमा हुने प्रतियोगितामा ५ लाख ३८ हजार रुपैयाँ खर्च हुने आयोजकको अनुमान छ ।

प्रतियोगिता सफल पार्न विभिन्न उपसमिति समेत गठन गरिएको छ । आर्थिक व्यवस्थापन उपसमिति संयोजक दीपकप्रसाद बराल, प्रचारप्रसार संयोजक सावित्री कोइराला, प्राथमिक उपचार संयोजक कमला गौतम, मञ्च, साउन्ड सिस्टम खाजा तथा खेलकुद व्यवस्थापन संयोजक विमल श्रेष्ठ तोकिएका छन् ।

निर्णयक मण्डल व्यवस्थापन तथा चिठीपत्रमा हेमराज भण्डारी, स्रष्टा सम्मान व्यवस्थापनमा वसन्तराज भण्डारी, अतिथि सत्कारमा कमला सुनार, स्वयंसेवक परिचालनमा मुन्द्रमान श्रेष्ठ, तीज गीत प्रतियोगी व्यवस्थापनमा महेश्वर बराल, महोत्सव अनुगमन तथा मूल्यांकनमा लक्ष्मण कोइराला र महोत्सव सल्लाहकार उपसमितिको संयोजकमा उज्वल खत्रीलाई चयन गरिएको छ । खेलकुदका लागि अफिसिएल रेफ्री सुशील केसी चयन गरिएको आयोजकले जनाएको छ ।