पोखरा । जैन सम्प्रदायले मनाउने प्रयुर्षण पर्वको अवसरमा आयोजित उपवास कार्यक्रमको पोखरामा समापनसँगै जैन भवनमा आइतबार सम्मान समारोह आयोजना गरियो ।
समारोहमा वरिष्ठ कलाकार सन्तोष पन्त, धर्मपाल वशिष्ठ, डा. नारायणाचार्य देवबाबा, ज्यो.नीरविक्रम पौडेल, कर्णेल जयेन्द्र सिंह बस्नेत, कास्की जिल्ला अदालतका न्यायाधीशद्वय दण्डपाणि शर्मा र विष्णु उपाध्याय, पूर्वमन्त्री महादेव गुरुङ, नेपाली कांग्रेस कास्कीका सभापति कृष्ण केसी, विश्व हिन्दु महासंघका केन्द्रीय उपाध्यक्ष शंकर खराल लगायतलाई सम्मान गरिएको थियो ।
नेपाल केशरी डा.मणिभद्र मुनि महाराज, ब्राह्मण समाज नेपालका अध्यक्ष डा.नारायणप्रसाद अधिकारी, अग्रज पत्रकार कृष्णप्रसाद बास्तोला र मानव मिलन संस्था पोखराका अध्यक्ष गुप्तप्रसाद शर्माले सम्मान अर्पण गरेका थिए ।
समारोहलाई सम्बोधन गर्दै वरिष्ठ कलाकार सन्तोष पन्तले देश जोगाउन हाम्रो सनातन हिन्दु संस्कृतिको संरक्षण गर्नु आवश्यक रहेको बताए ।
पयुर्षण पर्वमा मानव मिलन अन्तर्राष्ट्रिय महिला विभाग सचिव सावित्री शर्माले शुद्ध जलमात्र पिएर ८ दिन, लक्ष्मी लामिछाने, कमला सुवेदी र दीपा शाहले ३/३ दिन उपवास गरेका थिए । यसैगरी गौमती विकले ८ दिन एकासना गरेकी थिइन् ।