रुपा । आफ्नै पालिकाभित्र नजिक स्वास्थ्य चौकी छैन । एउटा सिटामोल किन्न पनि अर्को जिल्ला पुग्नुपर्छ । नत्र जिल्ला सदरमुकाम झर्नुको विकल्प छैन । रुपा गाउँपालिका १ स्यास्त्रीका नागरिकको हिजोसम्मको दुख हो, यो । लमजुङको रामबजार पुगेर औषधीमुलो गर्दै आएका नागरिकको दुखलाई गाउँपालिकाले मलम लगाइदिएको छ । भवन र उपकरण सहितका स्वास्थ्य कर्मी व्यवस्था गरेर बिहीबार स्वास्थ्य केन्द्रको सुरुआत गरिएको छ ।

गाउँपालिकाको ५ लाख लागतमा निर्माण भएको २ कोठे स्वास्थ्य केन्द्रको पालिका अध्यक्ष नवराज ओझाले उद्घाटन गरे । स्वास्थ्य केन्द्रमा आधारभूत स्वास्थ्य सेवा उपलब्ध हुने अध्यक्ष ओझाले बताए । यसबाट रुपा १ र ७ का नागरिकले सेवा पाउने छन् । केन्द्रमा अहेब, अनमी र सहयोगी गरेर ३ जना स्वास्थ्य कर्मीको व्यवस्था गरिएको पालिकाले जनाएको छ ।

‘यो ठाउँका नागरिक अहिलेसम्म स्वास्थ्यको पहुँचमा पुग्न सकेका छैनन् । रुपाको अत्यन्तै विकट ठाउँ हो स्यास्त्री,’ उनले भने, ‘अब सानोतिनो उचारका लागि टाढा धाउनु पर्दैन । औषधी नपाएर रोग पालिराख्नु पर्दैन ।’ उनले थप स्वास्थ्य चौकी निर्माणको चरणमा रहेको बताए । पालिकाभरिका स्वास्थ्य केन्द्रको स्तरोन्नतिमा बढी जोड दिइएको उनको भनाइ छ । ‘नभएका ठाउँमा नयाँ बनाउने । भएका ठाउँमा स्तरोन्नति गर्दै जाने,’ उनी भन्छन्, ‘गाउँमा सरकार आयो भनेर नागरिक खुसी छन् । सिटामोल किन्न सदरमुकाम जानुप¥यो भने हाम्रो विडम्बना हो । व्यवस्थालाई नागरिकले मन पराउँदैनन् ।’ उनले गाउँगाउँबाट एम्बुलेन्स सेवा सुरु गर्ने प्रतिबद्धता जनाएका छन् ।

गाउँमै स्वास्थ्य सुविधा पाउने भएपछि नागरिक खुसी छन् । वडा नम्बर १ का अध्यक्ष दीपक आलेले क्षमता र सं्रोत अनुसार सेवा र पूर्वाधार थप्दै गएको बताए । उनले पालिका बनेपछि नागरिकले सुविधा पाउन थालेको बताएका छन् । कार्यक्रममा प्रमुख प्रशासकीय अधिकृत सन्तोष ढुंगाना, नेकपाका वडाध्यक्ष पुष्प खनाल र नेपाली कांग्रेसका वडा सभापति बुद्धिबहादुर खड्का लगायतले स्वास्थ्य केन्द्रले जनतालाई सेवा पुग्ने बताए ।